డీఆర్డీఓ మాజీ చైర్మన్ సతీష్ రెడ్డికి ‘చేంజ్ మేకర్ 2026’ పురస్కారం — చిరంజీవి ప్రదానం

డిఆర్డిఓ మాజీ చైర్మన్ డాక్టర్ గుండ్ర సతీష్ రెడ్డికి ‘చేంజ్ మేకర్ 2026’ పురస్కారం లభించింది. ఎంఎస్కో సంస్థ ఈ అవార్డును ఏర్పాటు చేసింది. ప్రముఖ అంతర్జాతీయ మెజిషియన్, రచయిత బివి పట్టాభిరామ స్మారకంగా ఈ పురస్కారాన్ని ప్రతి ఏటా ఇవ్వాలని నిర్ణయించారు. ఈ తొలి పురస్కారాన్ని నటుడు చిరంజీవి సతీష్ రెడ్డికి అందించారు.

కార్యక్రమంలో మంత్రి సత్యకుమార్, మాజీ ఎంపి కెవిపి రామచంద్రరావు, సీనియర్ పాత్రికేయులు రామచంద్రమూర్తి పాల్గొన్నారు. సతీష్ రెడ్డి శాస్త్ర, సాంకేతిక రంగాల్లో చేసిన కృషికి గుర్తింపుగా ఈ అవార్డును అందచేసినట్లు నిర్వాహకులు తెలిపారు.

అవార్డు స్వీకరించిన సతీష్ రెడ్డి మాట్లాడుతూ, 1960లో సూరి భగవంతం తర్వాత డిఆర్డిఓ చైర్మన్ అయిన రెండవ తెలుగు వ్యక్తి తానేనని గుర్తు చేశారు. తనకు వచ్చిన ఈ గుర్తింపు మొత్తం శాస్త్రవేత్తల కృషికి ప్రతీక అని అన్నారు. ఈ అవార్డును శాస్త్రవేత్తలందరికీ అంకితం చేస్తున్నట్లు తెలిపారు.

చిరంజీవి మాట్లాడుతూ, మానసిక రుగ్మతలతో బాధపడేవారికి సహాయం చేసిన బివి పట్టాభిరామ స్మృతిలో, భారతదేశ రక్షణకు అత్యంత కృషి చేసిన తెలుగు వ్యక్తిని సత్కరించడం గొప్ప అనుభవంగా ఉందని అన్నారు.