రాయిదుర్గం భూవివాదం: SBI పిటిషన్ ఉపసంహరణకు అంగీకారం, ప్రభుత్వ లావాదేవీలు యథాతథం

తెలంగాణ ప్రభుత్వంతో SBI లావాదేవీలు యథాతథంగా కొనసాగనున్నాయి. రాయిదుర్గం భూవివాదంలో హైకోర్టులో దాఖలు చేసిన పిటిషన్‌ను ఉపసంహరించుకోవడానికి SBI అంగీకరించింది. ఈ మేరకు సోమవారం సీఎస్ రామకృష్ణారావుతో జరిగిన భేటీలో SBI ప్రతినిధులు హామీ ఇచ్చారు.

రాయిదుర్గంలో ప్రభుత్వం కేటాయించిన 2.5 ఎకరాల భూమిని ప్రత్యామ్నాయంగా తీసుకోవడానికి SBI ఇంతకుముందు నిరాకరించింది. దీంతో కోర్టులో పిటిషన్ వేసి స్టే తెచ్చుకుంది. ఈ చర్యపై తెలంగాణ ప్రభుత్వం తీవ్ర అసంతృప్తి వ్యక్తం చేసింది. లీడ్ బ్యాంక్ హోదా రద్దు చేస్తామని, ఫైనాన్స్ మినిస్ట్రీ, ఆర్బీఐకి ఫిర్యాదు చేస్తామని హెచ్చరించింది.

ప్రభుత్వం కఠినంగా స్పందించడంతో, SBI హైకోర్టులో దాఖలు చేసిన పిటిషన్‌ను ఉపసంహరించుకోవడానికి అంగీకరించింది. సీఎం రేవంత్ రెడ్డి ఢిల్లీ పర్యటన సందర్భంగా ఈ పరిణామం చోటు చేసుకుంది. సీఎస్ కూడా ఢిల్లీ వెళ్లి నివేదిక ఇచ్చారు. తర్వాత SBI ప్రతినిధులు పిటిషన్ ఉపసంహరణకు సిద్ధంగా ఉన్నట్లు తెలిపారు.

అయితే, కోర్టు తదుపరి విచారణ తర్వాతే ఈ నిర్ణయం అమలు చేస్తామని SBI స్పష్టం చేసింది. ప్రస్తుతానికి లీడ్ బ్యాంక్ హోదా, ఫిక్స్డ్ డిపాజిట్లు, ప్రభుత్వ గ్రాంట్లు యథాతథంగా కొనసాగుతాయని ప్రకటించింది. ప్రభుత్వం కూడా ఈ ప్రతిపాదనకు అంగీకరించినట్లు తెలుస్తోంది.