రేడియం స్టిక్కర్ల అధిక ధరలపై మిర్యాలగూడ వాహనదారుల ఆందోళన

నల్గొండ జిల్లా మిర్యాలగూడలో వాహన ఫిట్నెస్ కోసం తప్పనిసరి రేడియం స్టిక్కర్లను అధిక ధరలకు విక్రయిస్తున్నారని వాహనదారులు ఆందోళన వ్యక్తం చేస్తున్నారు.

రోడ్డు ప్రమాదాల నివారణలో భాగంగా ప్రభుత్వం అన్ని వాహనాలకూ రిఫ్లెక్టివ్ స్టిక్కర్లను అమర్చాలని నిబంధన విధించింది. మిర్యాలగూడ ఎంవీఐ కార్యాలయం సమీపంలో ప్రైవేటు ఏజెంట్లు ఈ స్టిక్కర్ల పంపిణీ చేపడుతున్నారు. అయితే వాహనం కొలతలతో సంబంధం లేకుండా ఏకపక్షంగా డబ్బులు వసూలు చేస్తున్నారని వాహనదారులు చెబుతున్నారు.

గతంలో ఓ లారీకి రేడియం స్టిక్కర్ల కోసం సుమారు రూ. 500 వసూలు చేసేవారని, ఇప్పుడు రూ. 4,500 నుంచి రూ. 5,000 వరకు వసూలు చేస్తున్నారని ఓ లారీ యజమాని తెలిపారు. “ఎక్కడ బండి అయినా, లోకల్ వాహనమైనా ధరలో తేడా లేదు. 4,500 ఒక్క రూపాయి కూడా తక్కువ లేదు” అని ఆయన బాధపడ్డారు. ఆటోలు, ట్రాక్టర్లు, ఇతర పెద్ద వాహనాలకూ ఇదే ధర విధిస్తున్నారని ఆరోపించారు.

డీజిల్ ధరలు పెరిగి, లోడింగ్ తగ్గిన తరుణంలో ఈ అదనపు భారం తమకు నష్టం కలిగిస్తోందని లారీ యజమానులు వాపోతున్నారు. మిర్యాలగూడ ఎంవీఐ కార్యాలయంలో స్టిక్కరింగ్ వ్యవహారాన్ని ఇష్టారాజ్యంగా నిర్వహిస్తున్న ప్రైవేట్ ఏజెంట్లపై ఉన్నతాధికారులు వెంటనే చర్యలు తీసుకోవాలని వారు డిమాండ్ చేస్తున్నారు. నాణ్యమైన స్టిక్కర్లను సరసమైన ధరకు అందించే ఏర్పాట్లు చేయాలని కోరుతున్నారు.