స్కూల్స్ రీఓపెన్: రంగారెడ్డిలో స్కూల్ బస్సులపై 28 కేసులు, 12 బస్సుల సీజ్

రాష్ట్రంలో స్కూళ్లు, కాలేజీలు తిరిగి ప్రారంభమైన నేపథ్యంలో రవాణా శాఖ విద్యార్థుల భద్రతపై ప్రత్యేక తనిఖీలు చేపట్టింది. రంగారెడ్డి జిల్లాలో ఈ డ్రైవ్‌లో భాగంగా స్కూల్ బస్సులపై 28 కేసులు నమోదు చేయగా, 12 బస్సులను సీజ్ చేశారు.

ఫిట్నెస్ సర్టిఫికెట్, ఇన్సూరెన్స్, పర్మిట్, పొల్యూషన్ సర్టిఫికెట్, ఎమర్జెన్సీ ఎగ్జిట్ డోర్లు, సీసీ కెమెరాలు, జీపీఎస్ ట్రాకింగ్ వ్యవస్థ వంటి భద్రతా ప్రమాణాలను అధికారులు తనిఖీ చేస్తున్నారు. ఫిట్నెస్ లేని బస్సులను అక్కడికక్కడే సీజ్ చేస్తున్నారు. లైసెన్స్ లేని డ్రైవర్లపైనా చర్యలు తీసుకుంటున్నారు.

సుప్రీంకోర్టు మార్గదర్శకాలు, రవాణా శాఖ నిబంధనలను తప్పనిసరిగా పాటించాలని విద్యా సంస్థల యాజమాన్యాలకు అధికారులు సూచించారు. విద్యార్థుల భద్రత విషయంలో నిర్లక్ష్యం వహిస్తే కఠిన చర్యలు తప్పవని హెచ్చరించారు.