పశ్చిమాసియా వివాదంలో ప్రధాని మోదీ దౌత్య చొరవకు ఆస్ట్రేలియా మాజీ ప్రధాని ప్రశంసలు

ప్రధాని నరేంద్ర మోదీ పశ్చిమాసియా సంఘర్షణ నేపథ్యంలో సంభాషణ, దౌత్యం మరియు సంయమనం పాటించాలని నిలకడగా పిలుపునిస్తూ చాలా సానుకూల పాత్ర పోషించారని ఆస్ట్రేలియా మాజీ ప్రధాని స్కాట్ మారిసన్ ప్రశంసించారు. ఈ మేరకు ఓ ఇంటర్వ్యూలో ఆయన వ్యాఖ్యలు చేశారు.

పశ్చిమాసియాలో భారత కార్మికులు లక్షల సంఖ్యలో ఉన్న విషయాన్ని గుర్తు చేస్తూ, ప్రధాని మోదీ తన దేశ ఇంధన భద్రత, ఆర్థిక స్థిరత్వం దృష్ట్యా సమస్యలను ఎంతో సమర్థవంతంగా నిర్వహించారని చెప్పారు. మారిసన్ మాట్లాడుతూ, "ప్రధాని మోదీ నిర్మాణాత్మకంగా, సహనంగా వ్యవహరిస్తూ అంతర్జాతీయంగా మంచి పాత్ర పోషించారు. దేశీయంగా ఇంధన సరఫరా, నిల్వల విషయంలో వాస్తవిక సవాళ్లను సమర్థంగా ఎదుర్కొన్నారు. ఈ ఘనతకు ఆయన ప్రత్యేక గుర్తింపు పొందాల్సిందే" అని అన్నారు.

భారత్‌కు గల్ఫ్ దేశాల నుంచి ముడి చమురు దిగుమతులు కీలకం. పశ్చిమాసియా అస్థిరత వల్ల ఇంధన ధరలు పెరిగే ప్రమాదం ఉంది. ఈ నేపథ్యంలో ప్రధాని మోదీ వివాద పక్షాల మధ్య చర్చలు, సంయమనం కోసం చేసిన ప్రయత్నాలు అంతర్జాతీయంగా మంచి స్పందన పొందాయి. గత కొద్ది రోజులుగా పశ్చిమాసియాలో తలెత్తిన ఉద్రిక్తతలు ప్రపంచ మార్కెట్లను కుదిపేస్తుండగా, భారత్ స్థిరమైన వైఖరితో దౌత్య మార్గాలకు మద్దతు తెలియజేసింది.

స్కాట్ మారిసన్ 2018 నుంచి 2022 వరకు ఆస్ట్రేలియా ప్రధానిగా పనిచేశారు. ఆయన చేసిన వ్యాఖ్యలు భారత-ఆస్ట్రేలియా సంబంధాలలో వ్యూహాత్మక భాగస్వామ్యాన్ని మరింత బలపరిచేలా ఉన్నాయి.