సెబి నిషేధాజ్ఞలతో రాజేష్ ఎక్స్‌పోర్ట్స్ సంక్షోభం; ₹12,726 కోట్ల ఇన్వెస్టర్ సంపద ఆవిరి

సెక్యూరిటీస్ మార్కెట్ నియంత్రణ సంస్థ సెబి ఈ నెల 3వ తేదీన రాజేష్ ఎక్స్‌పోర్ట్స్ కంపెనీపై మధ్యంతర నిషేధాజ్ఞలు జారీ చేసింది. ఆదాయాన్ని అధికంగా చూపించారనే ఆరోపణలతో ఈ కంపెనీని సెక్యూరిటీస్ మార్కెట్ నుంచి బహిష్కరించింది.

కంపెనీ ప్రమోటర్ రాజేష్ మెహతాపై 2020-21 నుంచి 2024-25 వరకు ఆదాయాన్ని ₹15.15 లక్షల కోట్లకు పెంచి చూపించినట్లు ఆరోపణలు ఎదురవుతున్నాయి. రాజేష్ ఎక్స్‌పోర్ట్స్ విదేశీ అనుబంధ సంస్థల నుంచే 99% ఆదాయం వస్తోందని చెబుతోంది. ఈ వ్యవహారంపై సెబి దర్యాప్తు కొనసాగిస్తోంది.

ఈ కంపెనీలో ప్రభుత్వ రంగ దిగ్గజం ఎల్ఐసీ తన వాటాను 2016లో 1.99% నుంచి 10.8% వరకు పెంచుకోవడం గమనార్హం. అదే సమయంలో విదేశీ సంస్థాగత ఇన్వెస్టర్లు తమ వాటాను 15.87% నుంచి 14.2%కి తగ్గించారు. ఈ నేపథ్యంలో ఎల్ఐసీ మాత్రమే వాటాను పెంచుకోవడంపై అనేక ప్రశ్నలు తలెత్తుతున్నాయి.

సెబి నిషేధాజ్ఞలతో కంపెనీపై ఉన్న ₹12,726 కోట్ల విలువైన ఇన్వెస్టర్ సంపద ఆవిరైంది. ఇందులో ఎల్ఐసీతో పాటు 94 వేల మంది రిటైల్ ఇన్వెస్టర్ల కష్టార్జితం కూడా ఉంది.