రాజేష్ ఎక్స్‌పోర్ట్స్‌పై సెబీ చర్యలు: షేర్ 5% పతనం, LIC కి రూ.3,000 కోట్ల నష్టం

బంగారం ఆభరణాలు, శుద్ధి, ఎగుమతులు చేసే రాజేష్ ఎక్స్‌పోర్ట్స్ లిమిటెడ్ షేర్ ధర రెండో రోజు కూడా భారీగా పతనమైంది. 5% నష్టంతో షేర్ లోయర్ సర్క్యూట్‌కు చేరింది. దీనికి సెబీ విడుదల చేసిన 109 పేజీల మధ్యంతర నివేదికలోని ఆరోపణలే కారణం.

సెబీ నివేదిక ప్రకారం, బెంగళూరుకు చెందిన ఈ సంస్థ 2020-21 నుంచి 2024-25 మధ్య మొత్తం రూ.15.15 లక్షల కోట్ల ఆదాయాన్ని చూపింది. ఇందులో 98 శాతం విదేశీ అనుబంధ సంస్థల నుంచి వచ్చినట్లు లెక్కలు పెట్టింది. అయితే ఈ ఆదాయం చాలా వరకు నకిలీదని, రౌండ్ ట్రిప్పింగ్ ద్వారా అమ్మకాలు, కొనుగోళ్లు చూపించి టర్నోవర్ పెంచినట్లు సెబీ పేర్కొంది.

ఈ క్రమంలో కంపెనీ ఎగ్జిక్యూటివ్ చైర్మన్ రాజేష్ మెహతా వ్యక్తిగత ఖాతా నుంచి జరిపిన బంగారం డెరివేటివ్స్ ట్రేడింగ్ లావాదేవీలను కంపెనీ లావాదేవీలుగా చూపించారని, దక్షిణాఫ్రికాలో రూ.35 కోట్ల పెట్టుబడులు పెట్టినట్లు చూపించగా ఆధారాలు లేవని సెబీ వెల్లడించింది. దీంతో రాజేష్ మెహతాపై షేర్ల లావాదేవీల నిషేధం విధించింది.

ప్రభుత్వ రంగ సంస్థ LIC రాజేష్ ఎక్స్‌పోర్ట్స్‌లో 10% వాటా కలిగి ఉంది. షేర్ ధర 90% పడిపోవడంతో LIC కి దాదాపు రూ.3,000 కోట్ల నష్టం వాటిల్లింది. సెబీ దర్యాప్తు ఇంకా కొనసాగుతోంది.