గడే సాయి కృష్ణ కేసు: సీఐ నాగరాజుపై రెండో రోజు సిట్ విచారణ

గడే సాయి కృష్ణ లాకప్ మృతి కేసులో సీఐ నాగరాజును సిట్ ఇవాళ రెండో రోజు విచారిస్తోంది. సుప్రీంకోర్టు ఆదేశాల ప్రకారం ఉదయం 10 నుంచి సాయంత్రం 5 గంటల వరకు విచారణ కొనసాగుతుంది.

నిన్న విజయవాడ కోర్టులో నాగరాజును ప్రవేశపెట్టగా, ఇరు పక్షాల న్యాయవాదులు వాదనలు వినిపించారు. నిందితుడి తరపు న్యాయవాది సామసేవరావు, జైల్ మాన్యువల్ ప్రకారం ఉదయం 10 నుంచి సాయంత్రం 5 వరకు మాత్రమే విచారణ ఉండాలని, రాత్రివేళల్లో సుదీర్ఘ ఇంటరాగేషన్‌లకు అనుమతి లేదని వాదించారు. న్యాయవాది సమక్షంలో విచారణ జరగాలని కోరారు. ప్రాసిక్యూషన్ తరపున న్యాయవాది, సిసీ కెమెరాల పర్యవేక్షణలో భద్రతా ఏర్పాట్లతో రూమ్ కేటాయించామని, కోర్టు ఆదేశాల మేరకే విచారణ చేస్తామని తెలిపారు. ఇరువురి వాదనలు విన్న న్యాయమూర్తి, ఎలాంటి ఇబ్బందులు ఎదురైనా తనకు తెలియజేయాలని సూచిస్తూ నాగరాజును పోలీస్ కస్టడీకి అనుమతించారు.

మొదటి రోజు మధ్యాహ్నం 2 నుంచి రాత్రి 7 వరకు సాగిన విచారణలో నాగరాజు ప్రతి ప్రశ్నకు ‘తెలీదు’ అని సమాధానం చెప్పారు. మార్కాపురం నుంచి సాయి కృష్ణను తీసుకొచ్చి కృష్ణలంక పోలీస్ స్టేషన్‌లో అప్పగించిన విషయాన్ని సిట్ చూపిన ఆధారాలతో అంగీకరించినా, మిగతా ప్రశ్నలన్నింటికీ మౌనం వహించారు. ఈ కేసుకు సంబంధించి మరో నలుగురు కానిస్టేబుల్స్, ప్రైవేట్ వ్యక్తి A4 సురేశ్, మహిళా కానిస్టేబుల్, ఆర్‌ఎంపీ డాక్టర్ నుంచి సిట్ సమాచారం సేకరించింది. ఆ వివరాల ఆధారంగా నేడు రెండో రోజు ప్రశ్నిస్తున్నారు.

సాయి కృష్ణ తల్లి స్పందిస్తూ, చంద్రబాబు నాయుడు ఈ కేసులో చేరిన తర్వాత కేసు తప్పుదారి పట్టించారని ఆరోపించారు. మరోవైపు కృష్ణలంక పోలీస్ స్టేషన్‌లో దొరికిన రక్తపు మరకల లాఠీ, బూడిద, సగం కాలిన హ్యాండ్‌కఫ్స్‌ వంటి వస్తువులు సాయి కృష్ణకు సంబంధించినవా అనే కోణంలోనూ సిట్ ఆరా తీస్తోంది. ప్రస్తుతం విచారణ సిట్ కార్యాలయంలో కొనసాగుతోంది.