విత్తన శుద్ధితో తొలిదశ చీడపీడల నివారణ సాధ్యం: జగిత్యాల కేవీకే నిపుణుడు

జగిత్యాల రైతు విజ్ఞాన కేంద్రం కోఆర్డినేటర్ విజయభాస్కర్, విత్తన శుద్ధి చేపడితే తొలిదశలో వచ్చే చీడపీడలను గణనీయంగా తగ్గించవచ్చని సూచించారు. నాణ్యమైన విత్తనంతో పాటు శుద్ధి చేసిన విత్తనం నాటడం చాలా ముఖ్యమని ఆయన వివరించారు.

వివిధ పంటలకు విత్తన శుద్ధి ఇలా చేయాలి: వరి విత్తనం ఒక కిలోకు Carbendazim 3 గ్రాములు పొడిగా కలపాలి. తడి విత్తనానికి 1 గ్రాము Carbendazim సరిపోతుంది. పత్తి పంటలో ఎండు తెగులు నివారణకు ఒక కిలో విత్తనానికి Trichoderma viride 10 గ్రాములు కలపాలి. ఆకుమచ్చ తెగుళ్ళకు Mancozeb లేదా Thiram 3 గ్రాములు వాడాలి.

మొక్కజొన్నలో కత్తర పురుగు రాకుండా ఒక కిలో విత్తనానికి Cyantraniliprole + Thiamethoxam 6 ml లేదా Imidacloprid 4 ml కలపాలి. ఆకుమచ్చ నివారణకు Carbendazim 2 గ్రాములు లేదా Trichoderma 10 గ్రాములు ఉత్తమం.

వేరుశనగ విత్తనాలకు Rhizobium culture 200 గ్రాములు పట్టిస్తే నత్రజని స్థిరీకరణ మెరుగవుతుంది. ఆకుమచ్చ తెగుళ్ళకు Tebuconazole 1 గ్రాము, వైరస్ వ్యాప్తి నివారించడానికి Imidacloprid 5 ml కలపాలి. నువ్వులకు Thiram 3 గ్రాములు లేదా Thiamethoxam 5 ml వాడాలి. పొద్దుతిరుగుడు విత్తనాలకు Imidacloprid 5 ml లేదా Thiamethoxam వాడితే నెక్రోసిస్ వైరస్ తగ్గుతుంది.

పెసర, మినుము వంటి పప్పుధాన్యాల్లో Thiamethoxam 5 గ్రాములు లేదా Monocrotophos 5 ml వాడి తెల్లదోమ, రసం పీల్చే పురుగులను అదుపు చేయవచ్చు. కంది విత్తనానికి Monocrotophos 5 ml, ఎండు తెగులకు Trichoderma 10 గ్రాములు వాడాలి. మిర్చి విత్తనాలను Trisodium Orthophosphate 150 గ్రాములతో అరగంట శుద్ధి చేస్తే వైరస్ తెగుళ్ళు తగ్గుతాయని విజయభాస్కర్ తెలిపారు.

శుద్ధి చేసుకోవడంతోపాటు పంట మార్పిడి పాటించడం, తెగుళ్ళను తట్టుకునే రకాలు ఎంచుకోవడం కూడా అవసరమని ఆయన సూచించారు.