దానయ్య మృతి కేసు: సీదిరి అప్పలరాజు పోలీస్ కస్టడీ

గొర్రెల కాపరి దానయ్య మృతి కేసులో సాక్ష్యాల తారుమారు ఆరోపణలపై YSRCP నేత, మాజీ మంత్రి సీదిరి అప్పలరాజును పోలీసులు నేడు కస్టడీకి తీసుకున్నారు.

పలాస జూనియర్ సివిల్ జడ్జి నిన్న ఒక్క రోజు పోలీస్ కస్టడీకి అనుమతి ఇచ్చారు. దీంతో ఈ రోజు ఉదయం గార మండలం జిల్లా జైలు నుంచి అప్పలరాజును కాశీబొగ్గ పోలీస్ స్టేషన్‌కు తరలించారు. మార్గమధ్యంలో సింగపురం ప్రాథమిక ఆరోగ్య కేంద్రంలో ఆయనకు వైద్య పరీక్షలు నిర్వహించారు.

కాశీబొగ్గ పోలీస్ స్టేషన్‌లో ఈ రోజు ఉదయం 10 గంటల నుంచి సాయంత్రం 5 గంటల వరకు ఆయనను విచారించే అవకాశం ఉంది. గత నెల 10వ తేదీన కాశీబొగ్గలో జరిగిన రోడ్డు ప్రమాదంలో దానయ్య మృతి చెందగా, ఆ ప్రమాదం అప్పలరాజు కుమారుడి బైక్ వల్ల జరిగిందని తెలుస్తోంది. ఈ కేసులో మరో వ్యక్తిని ఇరికించడానికి ప్రయత్నించినట్లు ఆరోపణలు ఉన్నాయి. దీనిపై పోలీసులు సాక్ష్యాల తారుమారు కేసు నమోదు చేశారు.

అప్పలరాజు గతంలో ఈ ఘటనలో అరెస్ట్ అయి రిమాండ్ ఖైదీగా జైలులో ఉన్నారు. నేటి పోలీస్ కస్టడీ అనంతరం ఆయనను తిరిగి జైలుకు తరలించనున్నారు.