షాబాద్ హత్యల కేసు: నిందితుడు రాజ్ కుమార్ కోసం 14 బృందాలతో గాలింపు

షాబాద్‌లో ఆరుగురి హత్య కేసులో నిందితుడు రాజ్ కుమార్ కోసం పోలీసులు 14 బృందాలతో గాలింపు చేపట్టారు. చివరిసారిగా అతడు రంగారెడ్డి జిల్లా తెమ్మాపూర్ రైల్వే స్టేషన్ సమీపంలో కనిపించాడు. అక్కడ రైలుకు ఎదురుగా నిలబడి పక్కకు తప్పుకున్న దృశ్యాలు సీసీ కెమెరాల్లో రికార్డయ్యాయి.

పోలీసుల దర్యాప్తులో నిందితుడు పూర్తి ప్రణాళికతో హత్యలు చేసినట్లు తేలింది. షాద్‌నగర్‌లో సెల్ఫ్ డ్రైవ్ కారు అద్దెకు తీసుకుని, హత్యకు కత్తిని హైదరాబాద్ లేదా షాద్‌నగర్‌లో కొనుగోలు చేసినట్లు గుర్తించారు. ఆ కత్తికి తుప్పు పట్టినట్లు క్లూ టీం నిర్ధారించింది. అతడు 4 ఫోన్లు, 16 సిమ్ కార్డులు వాడినట్లు సిడిఆర్ విశ్లేషణలో బయటపడింది. ప్రస్తుతం వాటిలో ఏ ఒక్కటి వినియోగంలో లేదు.

షాబాద్ ఇంట్లో బాలిక తల్లి, నాన్నమ్మను చంపిన తర్వాత, బాలికను 5 కిలోమీటర్ల దూరంలోని దైవాలగూడ చెరువు వద్దకు తీసుకెళ్లి గొంతు కోశాడు. కారులో తనతో రావాలని బలవంతం చేయగా, బాలిక తిరస్కరించడంతో హత్య చేసినట్లు పోలీసులు అనుమానిస్తున్నారు. హత్యల తర్వాత 11వ తేదీ ఉదయం వరకు నందిగామ, కొత్తూరు, షాబాద్ మండలాల నిర్మానుష్య ప్రాంతాల్లో తిరిగినట్లు సమాచారం.

పెట్రోల్ అయిపోవడంతో కారును తెమ్మాపూర్ స్టేషన్ వద్ద వదిలేసి రైలులో పారిపోయినట్లు పోలీసులు భావిస్తున్నారు. కుటుంబ సభ్యుల ప్రకారం నిందితుడి వద్ద డబ్బు తక్కువగా ఉంది. దీంతో శ్రీశైలం, బెంగళూరు మార్గాల్లో హోటళ్లు, లాడ్జీలు, దాబాలు, బస్ స్టేషన్లు, రైల్వే స్టేషన్లలో గాలింపు ముమ్మరం చేశారు. నిందితుడి తల్లిదండ్రులు, బంధువులను అదుపులోకి తీసుకుని విచారిస్తున్నారు.

ఫ్యూచర్ సిటీ పోలీస్ కమిషనర్ తరుణ్ జోషి, చేవెళ్ళ డిసిపి యోగేశ్ గౌతమ్ కేసు పురోగతిని నిత్యం సమీక్షిస్తున్నారు. షాబాద్ పోలీస్ స్టేషన్ సిబ్బందిపై వచ్చిన ఆరోపణల నేపథ్యంలో ఎస్ఓటి, ఇతర స్టేషన్ల సిబ్బందిని గాలింపుకు రంగంలోకి దించారు.