షాబాద్‌లో ఆరు హత్యల కేసు: బంధువుల ధర్నా కొనసాగింపు

రంగారెడ్డి జిల్లా షాబాద్‌లో ఆరు హత్యల ఘటన తర్వాత బాధిత బంధువులు పోలీస్ స్టేషన్ ఎదుట ధర్నా చేపట్టారు. షాద్‌నగర్-చేవెళ్ల రహదారిపై రోడ్డుపైనే ఆందోళనకు దిగడంతో భారీగా ట్రాఫిక్ జామ్ ఏర్పడింది.

పోక్సో కేసులో పోలీసులు నిర్లక్ష్యం వహించడం వల్లే ఈ దారుణం చోటు చేసుకుందని బంధువులు ఆరోపిస్తున్నారు. సదరు పోక్సో కేసులో దర్యాప్తు సరిగా జరగలేదని, అప్పట్లోనే నిందితుడిపై చర్యలు తీసుకుంటే ఆరు ప్రాణాలు కోల్పోయేవారు కాదని వారు ఆవేదన వ్యక్తం చేశారు. పోలీసుల నిర్లక్ష్యంపై సీఐ కాంతారెడ్డి, ఎస్ఐ రమేష్‌లపై చర్యలు తీసుకోవాలని డిమాండ్ చేశారు.

చేవెళ్ల డీసీపీ యోగేష్ బాధిత బంధువులతో మాట్లాడారు. నిందితుడి కోసం తొమ్మిది ప్రత్యేక బృందాలు గాలిస్తున్నాయని, ఉదయం 6 గంటలకు నిందితుడు వెళ్తున్న కారును గుర్తించామని, త్వరలోనే పట్టుకుంటామని ఆయన హామీ ఇచ్చారు. విచారణ తర్వాత నిర్లక్ష్యం రుజువైతే సంబంధిత పోలీసులపై చర్యలు తీసుకుంటామని చెప్పారు. అయినా బంధువులు ఆందోళన విరమించలేదు. ఫ్యూచర్ సిటీ కమిషనర్‌తో చర్చలకు రావాలని డీసీపీ ఆహ్వానించినా, కలెక్టర్ ఆధ్వర్యంలో రోడ్డుపైనే చర్చలు జరపాలని బంధువులు పట్టుబట్టారు.

నిందితుడు గతంలో బాధిత కుటుంబానికి చెందిన యువతిపై పోక్సో కేసు నమోదైంది. అయితే అరెస్టు చేయకుండా పోలీసులు కాలయాపన చేశారని బంధువులు ఆరోపించారు. దీంతో నిందితుడు బెదిరింపులకు పాల్పడి, చివరకు ఆరుగురిని హత్య చేశాడని వారు చెప్పారు. ప్రస్తుతం నిందితుడు పారిపోయాడని పోలీసులు భావిస్తున్నారు. సీసీటీవీ ఫుటేజీ, సీడీఆర్ లొకేషన్ ఆధారంగా అతడి జాడ తెలుస్తోందని, పట్టుకోవడమే తొలి ప్రాధాన్యతని డీసీపీ పేర్కొన్నారు.

ఈ కేసులో బాధిత కుటుంబాలకు న్యాయం జరిగేలా చూడాలని, నిందితుడిని వెంటనే పట్టుకోవాలని స్థానికులు డిమాండ్ చేస్తున్నారు. ఆందోళన కొనసాగడంతో ఆ ప్రాంతంలో ఉద్రిక్తత నెలకొంది.