షబ్బీర్ అలీ తీవ్ర వ్యాఖ్యలు: టీపీసీసీ అధ్యక్షుడు పదవులు డబ్బుకు ఇస్తున్నారని ఆరోపణ

కాంగ్రెస్ సీనియర్ నేత, తెలంగాణ ప్రభుత్వ సలహాదారు షబ్బీర్ అలీ తీవ్ర ఆవేదన వ్యక్తం చేశారు. పార్టీలో పదవులు డబ్బుకు అమ్ముడవుతున్నాయని ఆయన ఆరోపించారు. ఈ విషయమై ఆయన ఓ కార్యకర్తతో మాట్లాడిన ఫోన్ కాల్ ఆడియో లీక్ అయింది. ఆ ఆడియో ప్రస్తుతం సోషల్ మీడియాలో విస్తృతంగా చక్కర్లు కొడుతోంది.

షబ్బీర్ అలీ టీపీసీసీ అధ్యక్షుడు మహేష్ కుమార్ గౌడ్‌పై నేరుగా ఆరోపణలు చేశారు. పదవులు డబ్బుకు ఇస్తున్నారని, దీంతో కాంగ్రెస్ పార్టీ అమ్ముడుపోయే పార్టీగా తయారైందని ఆయన అన్నారు.

పార్టీలో నమ్మకంగా ఉండే కార్యకర్తలను పట్టించుకోవడం లేదని, ఇతర పార్టీల నుండి ఇటీవల వచ్చిన నేతలకు పదవులు అప్పగిస్తున్నారని షబ్బీర్ అలీ అసంతృప్తి వ్యక్తం చేశారు. తనకు అపాయింట్మెంట్ ఇవ్వడం లేదని, కామారెడ్డి నియోజకవర్గంలో తన పాత్రను కావాలనే పరిమితం చేశారని ఆవేదన చెందారు.

75 ఏళ్ల వయస్సులో ఇంత కష్టపడడం సరికాదని, తన అనుచరులు కూడా ఇకపై వేరే మార్గం చూసుకుంటామనే పరిస్థితి వచ్చిందని ఆడియోలో తెలిపారు.

ఈ ఆరోపణలపై టీపీసీసీ అధ్యక్షుడు మహేష్ గౌడ్, ముఖ్యమంత్రి రేవంత్ రెడ్డి నుంచి ఇప్పటివరకు స్పందన లేదు. పార్టీలోపల, సోషల్ మీడియాలో ఈ వ్యాఖ్యలు చర్చకు దారి తీశాయి.