తాడేపల్లిగూడెం: ముత్యాలమ్మ ఆలయంలో శాకంబరి అలంకరణ

పశ్చిమ గోదావరి జిల్లా తాడేపల్లిగూడెంలోని శ్రీ ముత్యాలమ్మ అమ్మవారి ఆలయంలో ఆషాఢ మాసం పురస్కరించుకుని అమ్మవారిని శాకంబరి మాతగా అలంకరించారు. ఈ ప్రత్యేక అలంకరణకు ఉల్లిపాయలు, రకరకాల కూరగాయలతో సహా సుమారు రెండు టన్నుల పదార్థాలను ఉపయోగించారు. భక్తులు పెద్ద సంఖ్యలో తరలివచ్చి అమ్మవారి శాకంబరి రూపాన్ని దర్శించుకున్నారు.

ఈ కార్యక్రమంలో స్థానిక ఎమ్మెల్యే బోలిశెట్టి శ్రీనివాస్ పాల్గొని అమ్మవారికి ప్రత్యేక పూజలు నిర్వహించారు. అనంతరం భక్తులకు ప్రసాదం పంపిణీ చేశారు. వర్షాల కొరత నేపథ్యంలో ప్రజలు, రైతులు, పశువులు ఇబ్బందులు పడుతున్నందున వరుణ యాగం నిర్వహించాల్సిన అవసరం ఉందని ఆయన అభిప్రాయపడ్డారు. అమ్మవారి ఆశీస్సులతో అందరికీ శాంతి, సుభిక్షం కలగాలని ఆకాంక్షించారు.

ఈ శాకంబరి అలంకరణకు ఉల్లిపాయలు, కూరగాయల వర్తక సంఘాల ప్రతినిధులు, స్థానిక మహిళలు సహకరించారు. వారి సేవా భావాన్ని ఎమ్మెల్యే అభినందించారు.