శని త్రయోదశి: శని దోష నివారణకు సూచించిన ప్రత్యేక పరిహారాలు

శనివారం, త్రయోదశి తిథి కలిసి వస్తే దాన్ని శని త్రయోదశి అంటారు. ఇది అరుదైన యోగమని జ్యోతిష గ్రంథాలు పేర్కొంటున్నాయి.

జాతకంలో శని అర్ధాష్టమ, అష్టమ లేదా ఏలినాటి శని స్థానాల్లో ఉన్నవారికి ఈ రోజున నివారణోపాయాలు ఉన్నాయి. శని త్రయోదశి రోజున తెల్లవారి నుంచి సాయంత్రం వరకు ఉపవాసం ఉండాలి. ప్రదోష సమయంలో శివాలయాన్ని సందర్శించి దీపారాధన చేయాలని పండితులు సూచిస్తున్నారు.

శనేశ్వరుడికి నువ్వుల నూనెతో దీపం వెలిగించడం, నవగ్రహ మండపంలో తైలాభిషేకం చేయడం, నీలం వర్ణం వస్త్రాన్ని అలంకరించడం మంచి ఫలితాన్నిస్తాయి. ఆలయాన్ని శుభ్రం చేయడం, వృద్ధులకు పండ్లు, ఆహారం దానం చేయడం కూడా శని దోష నివారణకు మార్గాలుగా శాస్త్రాలు చెబుతున్నాయి.

శని గ్రహ దోష నివారణకు ఈ రోజు అల్బుకారా లేదా అంజీర్ పండ్లను దానం ఇవ్వాలి. నీలాచల నిలయుడైన కృష్ణ పరమాత్మకు నీల వర్ణం కావడంతో కృష్ణ పూజ కూడా శని దోషాన్ని తగ్గిస్తుంది. అయితే శివారాధన ప్రత్యేకించి శని దోష నివారణ చేస్తుంది.

ధనురాశి, కుంభ రాశి, మీన రాశి, సింహ రాశి, కర్కాటక రాశి వారు ఈ దోషాలతో ప్రభావితమవుతారు. వీరు శని త్రయోదశి సందర్భాన్ని సద్వినియోగం చేసుకోవాలని నిపుణులు తెలిపారు.

నీలం మణి ఉంగరం ధరించడం, నువ్వుల నూనె దానం, నువ్వుల బియ్యం మిశ్రమాన్ని నీటిలో వదలడం, జమ్మి చెట్టు లేదా రాగి చెట్టు చుట్టూ ప్రదక్షిణ చేయడం – ఇవి అనుకూల పరిహారాలు. నీలాంజన సమాభాసం అనే శ్లోకాన్ని 19 సార్లు పఠించాలి.

శని గ్రహం క్రమశిక్షణ, సేవా దృక్పథం నేర్పుతుంది. వృద్ధుల అనుభవాలు తెలుసుకోవడం, ధ్యానం చేయడం, పది మందికి సహాయం చేయడం ద్వారా మానసిక బలాన్ని పెంపొందించుకోవచ్చు. శనేశ్వరుడు ఆయుష్యం, ప్రశాంత జీవనాన్ని అనుగ్రహిస్తాడని శాస్త్రాలు వివరిస్తున్నాయి.