కృష్ణా జిల్లా రైతు షేక్ బాజీ కూరగాయల అంతర పంటలతో డబుల్ లాభం

కృష్ణా జిల్లా బాపులపాడు మండలం కొత్తపల్లి గ్రామానికి చెందిన రైతు షేక్ బాజీ ఐదు ఎకరాల పామాయిల్ తోటలో అంతర పంటలుగా కూరగాయలు సాగు చేస్తున్నారు. ఇందులో రెండు ఎకరాల్లో నిలువు పందిరి విధానంలో కాకర, ఎకరం నుంచి బెండ, అర ఎకరంలో పొద చిక్కుడు నాటారు.

మే నెల 10వ తేదీన కాకర సాగు ప్రారంభించగా, ఇప్పటికే మూడు కోతలు కోశారు. మొదటి కోతలో కిలో రూ.50–60 ధర పలికింది. ప్రస్తుతం ధరలు పడిపోయి కిలో రూ.20గా ఉంది. ఇప్పటివరకు కాకరపై రూ.40 వేల ఆదాయం వచ్చింది. మరో 14 కోతలు కోయనున్నారు. కాకర మొత్తం దిగుబడి ద్వారా రూ.1.80 లక్షల వరకు ఆదాయం రావొచ్చని రైతు అంచనా.

బెండ సాగులో ఇప్పటికే 8 కోతలు కాగా, మరో 3–4 కోతలు రావాల్సి ఉంది. ధర కిలో రూ.30–40 నుంచి రూ.10కి పడిపోయింది. చిక్కుడు పంట దిగుబడి మరో నెలలో ప్రారంభమవుతుంది. ఐదు ఎకరాల కూరగాయల సాగుకు సుమారు రూ.1 లక్ష పెట్టుబడి అయినట్లు రైతు తెలిపారు.

"కాకర పంటపై వచ్చే ఆదాయంతో పెట్టుబడి అంతా వస్తుంది. బెండ, చిక్కుడు పంటలపై వచ్చేది నికర ఆదాయం. ఇతర పంటలతో పోల్చితే కూరగాయల సాగు 100 రెట్లు మెరుగు" అని షేక్ బాజీ చెప్పారు. కాకర తర్వాత అదే పొలంలో మిను లేదా మక్కజొన్న సాగు చేయనున్నట్లు పేర్కొన్నారు.