నల్గొండలో వైకల్యం ఉన్నా పీజీలో 90% మార్కులతో సత్తా చాటిన శివాని.. తండ్రి త్యాగం

నల్గొండ జిల్లా మిర్యాలగూడకు చెందిన శివాని (27) పుట్టుకతో వచ్చిన orthopaedic జన్యుపరమైన వ్యాధి కారణంగా నడవలేని స్థితిలో ఉన్నారు.

ఆమె తండ్రి వెంకటాచారి, బైక్ మెకానిక్‌గా పని చేస్తూ, కూతురిని ప్రతిరోజూ భుజంపై ఎత్తుకుని కాలేజీకి తీసుకెళ్లేవారు. చిన్నప్పటి నుంచి ఆమె ఎముకలు పెలుసుగా ఉండేవి. 15 ఏళ్ల వయసు వచ్చేసరికి కాళ్లు, చేతులు వంకర్లు తిరిగాయి. లక్షల రూపాయలు వెచ్చించినా, ఇది జన్యుపరమైన వ్యాధి అని, దీనికి చికిత్స లేదని వైద్యులు తెలిపారు.

శివాని శ్రీ నవజీవన్ హైస్కూల్ లో 10వ తరగతి, శ్రీ గౌతమి జూనియర్ కాలేజీలో ఇంటర్, హాసిత ఉమెన్స్ కాలేజీలో డిగ్రీ పూర్తి చేసి, విజేత ఉమెన్స్ డిగ్రీ కాలేజీలో పీజీ చేశారు. పీజీలో 90 శాతం మార్కులు సాధించారు.

ప్రస్తుతం శివాని తన చదువుకు తగిన ప్రభుత్వ ఉద్యోగం కావాలని కోరుతున్నారు. “నాకు అర్హత ఉన్న ఉద్యోగం ఇస్తే, ఎవరికీ భారం కాకుండా బతకగలను” అని శివాని చెప్పారు. ఆమె తండ్రి కూడా “నా కూతురు చదువుకు తగిన ఉద్యోగం కల్పించి ప్రభుత్వం ఆదుకోవాలి” అని విజ్ఞప్తి చేస్తున్నారు.

శివాని కథ సోషల్ మీడియాలో వైరల్ అవుతోంది. స్థానికులు ప్రభుత్వం ఆమెకు తగిన ఉద్యోగం కల్పించాలని డిమాండ్ చేస్తున్నారు.