ఎఫ్‌సీఆర్ఏ సవరణలను ఉపసంహరించుకోవాలన్న ప్రతిపక్షం: కాంగ్రెస్ ఎంపీ హిబీ ఈడెన్

ఫారిన్ కాంట్రిబ్యూషన్ రెగ్యులేషన్ యాక్ట్ (FCRA) కు ప్రభుత్వం ప్రతిపాదించిన సవరణలను జాయింట్ పార్లమెంటరీ కమిటీకి (JPC) గానీ, మరే ఇతర స్టాండింగ్ కమిటీకి గానీ పంపించకుండా నేరుగా ఉపసంహరించుకోవాలని ప్రతిపక్షం డిమాండ్ చేస్తోంది. ఈ విషయాన్ని కాంగ్రెస్ ఎంపీ హిబీ ఈడెన్ పార్లమెంట్‌లో స్పష్టం చేశారు.

ఈ సవరణలు దేశంలోని మైనారిటీలు, స్వచ్ఛంద సంస్థలపై వ్యవస్థీకృత దాడి లాంటివని హిబీ ఈడెన్ ఆరోపించారు. ఆరోగ్యం, విద్య, గిరిజన ప్రాంతాల్లో పనిచేస్తున్న అనేక సంస్థలతో పాటు మదర్ థెరిసా నడిపించిన మిషనరీస్ ఆఫ్ ఛారిటీ వంటి ఎన్జీవోలను బీజేపీ ప్రభుత్వం నిరంతరం ఇబ్బంది పెడుతోందని ఆయన విమర్శించారు. అయితే, ఆర్ఎస్ఎస్, సంఘ్ పరివార్ శక్తులు మాత్రం వివిధ దేశాల నుంచి నిధులు పొందుతున్నాయని ఆయన ఆరోపించారు.

ఇప్పటికే, విదేశీ నిధులు పొందే అన్ని సంస్థలు ఢిల్లీలోని ఎస్బీఐ పార్లమెంట్ స్ట్రీట్ బ్రాంచ్‌లో బ్యాంకు ఖాతాలు తెరవాలని, ఆ ఖాతాల ద్వారా మాత్రమే నిధులు రావాలని, పూర్తి నియంత్రణ కేంద్ర హోం మంత్రిత్వ శాఖకు ఉండే విధంగా నిబంధనలను ప్రభుత్వం సవరించిందని హిబీ ఈడెన్ గుర్తు చేశారు. ఈ నేపథ్యంలో మరింత కఠిన సవరణలు తీసుకువస్తుండడం దురదృష్టకరమని ఆయన అన్నారు.

ఈ సవరణల బిల్లును ప్రభుత్వం గురువారం పార్లమెంటులో ప్రవేశపెట్టగా, ప్రతిపక్ష సభ్యులు తీవ్ర వ్యతిరేకత వ్యక్తం చేశారు. ఎటువంటి కమిటీ పరిశీలన లేకుండా బిల్లును ఉపసంహరించుకోవాల్సిందేనని వారు స్పష్టం చేశారు.