పాట్నాలో ఖాన్ సర్ కోచింగ్ సెంటర్‌పై కాల్పులు; సెక్యూరిటీ గార్డుకు తీవ్ర గాయం

బిహార్ రాజధాని పాట్నాలో సోమవారం ప్రముఖ ఎడ్యుకేటర్ ఖాన్ సర్ నిర్వహిస్తున్న జీఎస్ రీసెర్చ్ సెంటర్ కోచింగ్ సంస్థపై దుండగులు కాల్పులు జరిపారు. ఈ దాడిలో ఓ సెక్యూరిటీ గార్డు తలకు తీవ్ర గాయమై పాట్నా మెడికల్ కాలేజ్ ఆస్పత్రిలో చికిత్స పొందుతున్నారు.

దుండగులు 8 నుంచి 10 రౌండ్ల వరకు కాల్పులు జరిపినట్లు ప్రత్యక్ష సాక్షులు తెలిపారు. ఈ ఘటనతో కోచింగ్ సెంటర్ వద్ద భయాందోళన నెలకొంది. పది నిమిషాల పాటు కాల్పుల శబ్దాలు వినిపించాయని, ఈ లోపు దాడి చేసిన వ్యక్తులు అక్కడి నుంచి పారిపోయారని స్థానికులు చెప్పారు.

ఖాన్ సర్ మీడియాతో మాట్లాడుతూ, పక్కనే ఉన్న మరో కోచింగ్ సెంటర్ నిర్వాహకులే ఈ దాడికి కారణమని అనుమానం వ్యక్తం చేశారు. తాను తక్కువ ఫీజులో విద్యార్థులకు నాణ్యమైన విద్య అందిస్తున్నందున, ఇతర కోచింగ్ సంస్థలు ఈ చర్యకు పాల్పడి ఉంటారని ఆరోపించారు.

“మా గార్డును గుర్తించి, టార్గెట్‌గా చేసుకున్నారు. సీసీటీవీ ఫుటేజ్ పోలీసులకు అందించాం. ఇది బాగా దురదృష్టకర ఘటన. ప్రభుత్వం మాకు భద్రత కల్పించాలి” అని ఖాన్ సర్ డిమాండ్ చేశారు. గతంలో కూడా తమ సెంటర్‌ను లక్ష్యంగా చేసుకునే మాటలు వినిపించాయని ఆయన వివరించారు.

పాట్నా పోలీసులు ఘనాస్థలానికి చేరుకుని, సీసీటీవీ ఫుటేజీ స్వాధీనం చేసుకుని దర్యాప్తు ప్రారంభించారు. ఘటనలో ఎవరైనా నిందితులను అదుపులోకి తీసుకున్నట్లు అధికారులు వెల్లడించలేదు.