శ్రావణ మాసంలో పుట్టింటి నుంచి పసుపు, కుంకుమ తప్పనిసరి కాదు: అనంత లక్ష్మి

శ్రావణ మాసంలో కొత్తగా పెళ్లైన మహిళలు పుట్టింటి నుంచి పసుపు, కుంకుమ తీసుకోవడం తప్పనిసరి కాదని ధార్మిక ప్రవచకురాలు అనంత లక్ష్మి తెలిపారు. చాలా ప్రాంతాల్లో ఈ ఆచారాన్ని నమ్ముతుంటారని, కానీ వ్రత కథల్లోగానీ, పూజా విధానాల్లోగానీ ఇలాంటి నియమం లేదని ఆమె వివరించారు.

కొన్ని ప్రాంతాల్లో ఇది కేవలం అలవాటు మాత్రమే అని అనంత లక్ష్మి చెప్పారు. అలవాటు మనకు అనుకూలంగా ఉంటే కొనసాగించవచ్చని, లేకపోతే అలాంటి అనవాయితీ మాకు లేదని చెప్పుకునే వీలు ఉందని ఆమె తెలిపారు.

గతంలో ఆషాఢ మాసంలో మహిళ పుట్టింట్లో ఉండేదని, శ్రావణ మాసంలో వ్రతం చేసుకునేందుకు వచ్చేటప్పుడు పసుపు, కుంకుమ తెచ్చుకునేదని ఆమె గుర్తుచేశారు. ఇది ప్రయాణ సౌకర్యాలు లేని రోజుల్లో ఇంట్లో దీపం, పూజ మానుకోకుండా ఉండేందుకు ఏర్పడిన సౌకర్య నియమమేనని వివరించారు.

పుట్టింటి నుంచి రావడం శుభప్రదమే అయినా, దాన్ని తప్పనిసరి నియమంగా పాటించాల్సిన అవసరం లేదని ఆమె చెప్పారు. 70 ఏళ్ల వచ్చాక కూడా పుట్టింటి నుంచి ప్రతి సంవత్సరం పసుపు, కుంకుమలు పంపమని అడగడం సరైన మర్యాద కాదని ఆమె అభిప్రాయపడ్డారు.