వృద్ధురాలిని అడవిలో వదిలేసిన జరాసంఘం ఎస్సై: పోలీస్ స్టేషన్ ముందు మహిళల నిరసన

సంగారెడ్డి జిల్లాలోని జరాసంఘం పోలీస్ స్టేషన్ ఎస్సై క్రాంతి పాటీల్ పై తీవ్ర ఆరోపణలు వచ్చాయి. నరసం అనే వృద్ధురాలు చైన్ స్నాచింగ్ ఫిర్యాదు చేసేందుకు స్టేషన్‌కు వెళ్ళింది. తాను పొలానికి వెళ్తున్న సమయంలో కొందరు దుండగులు బంగారు చైన్, చెవి కమ్మలు లాక్కెళ్ళారని ఆమె పోలీసులకు చెప్పింది.

ఫిర్యాదు విన్న ఎస్సై క్రాంతి పాటీల్ దొంగతనమే జరగలేదని బాధితురాలితో వాదించారు. అనంతరం విచారణ పేరుతో ఆమెను పోలీసు వాహనంలో ఎక్కించుకుని ఘటనాస్థలం వద్ద అటవీ ప్రాంతంలో ఒంటరిగా వదిలేసి వెళ్ళారని ఆరోపణలు వచ్చాయి.

ఈ సంఘటన తెలుసుకున్న గ్రామ మహిళలు బాధితురాలితో కలిసి జరాసంఘం పోలీస్ స్టేషన్‌కు వచ్చారు. పోలీసుల తీరుకు నిరసనగా స్టేషన్ ముందు ధర్నా చేశారు. ఈ ఘటన సంగారెడ్డి జిల్లాలో రెండో వివాదంగా మారింది. రెండు రోజుల క్రితమే కొండాపూర్ పోలీస్ స్టేషన్‌లో ఒక నిందితుడు, బంధువుతో కలిసి హెడ్ కానిస్టేబుల్ మద్యం సేవించిన ఘటన కలకలం రేపింది.

ఈ విషయంపై ఎస్సై క్రాంతి పాటీల్ స్పందన మరియు పై అధికారుల చర్యలు తెలియాల్సి ఉంది.