సిద్దాపూర్‌లో చెత్త రీసైక్లింగ్ ప్రాజెక్టుకు వ్యతిరేకంగా 8 గ్రామాల నిరసన

రంగారెడ్డి జిల్లా కొత్తూరు మండలం సిద్దాపూర్‌లో చెత్త రీసైక్లింగ్ ప్రాజెక్టు మరియు డంపింగ్ యార్డ్ ఏర్పాటు చేయాలని తెలంగాణ ప్రభుత్వం నిర్ణయించింది. ఈ నిర్ణయాన్ని వ్యతిరేకిస్తూ చుట్టుపక్కల ఎనిమిది గ్రామాల ప్రజలు నిరసనకు దిగారు.

సిద్దాపూర్, వేవుల, నర్వ, కోడిచర్ల, వైయం తండా సహా చుట్టుపక్కల గ్రామాల ప్రజలు ఆందోళన చేపట్టారు. ప్రతిరోజూ నగరాల నుంచి వచ్చే భారీ మొత్తంలో చెత్త వల్ల భూగర్భ జలాలు కలుషితమవుతాయని, గాలి విషపూరితంగా మారుతుందని స్థానికులు ఆందోళన వ్యక్తం చేస్తున్నారు. పంటలు, వ్యవసాయ భూములు నాశనమవుతాయని కూడా వారు పేర్కొంటున్నారు.

కాలుష్యం ఇలాగే కొనసాగితే గ్రామాల్లో జీవించడం కష్టమవుతుందని స్థానికులు చెప్తున్నారు. తక్షణమే గ్రామసభ నిర్వహించి ఈ నిర్ణయాన్ని వెనక్కి తీసుకోవాలని తీర్మానం చేసి ప్రభుత్వానికి పంపాలని నిర్ణయించారు. ప్రభుత్వం నిర్ణయాన్ని ఉపసంహరించుకోకపోతే నిరసనలు మరింత తీవ్రతరం చేస్తామని గ్రామస్థులు హెచ్చరించారు.

ఈ విషయంపై తెలంగాణ ప్రభుత్వం స్పందన తెలియాల్సి ఉంది.