బాసర మహంకాళి ఆలయంలో వెండి కిరీటం, హుండీ సొమ్ము చోరీ

నిర్మల్ జిల్లా బాసర శ్రీ జ్ఞాన సరస్వతి దేవాలయం ఆవరణలోని మహంకాళి అమ్మవారి ఆలయంలో శుక్రవారం అర్ధరాత్రి చోరీ జరిగింది.

దొంగలు వెనుక వైపు నుంచి ప్రవేశించి తలుపు గడియ పగలగొట్టి లోపలికి వెళ్లారు. అమ్మవారి వెండి కిరీటాన్ని, హుండీని ఎత్తుకెళ్లిన దొంగలు హుండీని పగలగొట్టి అందులోని నగదు తీసుకున్నారు.

ఈ ఘటన సమయంలో ఆలయంలో ఆరుగురు హోమ్ గార్డులు విధుల్లో ఉన్నారు. దొంగలు మూడు సీసీ కెమెరాలపై గుడ్డలు కప్పినట్లు తేలింది. అర్ధరాత్రి 12.30 గంటల సమయంలో భారీ వర్షం పడుతుండగా, విద్యుత్ సరఫరా అంతరాయంతో ఈ చోరీ జరిగినట్లు పోలీసులు గుర్తించారు.

ఆలయ ఈఓ అంజనీదేవి స్పందిస్తూ, బంగారు ఆభరణాలు సురక్షితంగా ఉన్నాయని, వెండి కిరీటం మాత్రమే ఎత్తుకెళ్లినట్లు తెలిపారు. చోరీకి గురైన హుండీని కొద్ది దూరంలో విసిరేసినట్లు గుర్తించామని చెప్పారు.

పోలీసులు సీసీటీవీ ఫుటేజ్ ఆధారంగా దొంగలను గుర్తించే పనిలో ఉన్నారు. ఇద్దరు దొంగలు చోరీ చేసినట్లు ఫుటేజ్‌లో స్పష్టంగా నమోదైంది. విచారణ కొనసాగుతోంది.