సింగపూర్ 3-దశల శీతలీకరణ వ్యూహం: భారత నగరాలకు పాఠాలు

ప్రపంచవ్యాప్తంగా ఎండలు పెరుగుతున్న సమయంలో సింగపూర్ చేపట్టిన శీతలీకరణ వ్యూహాలు చర్చనీయాంశంగా మారాయి. అక్కడి ప్రభుత్వం మూడు దశల్లో నగరాన్ని చల్లబరిచే ప్రణాళిక అమలు చేస్తోంది.

మొదటిది కూల్ పెయింట్స్. సాధారణ కాంక్రీట్ భవనాలు సూర్యరశ్మిని పీల్చుకుంటాయి. ఫలితంగా అర్బన్ హీట్ ఐలాండ్ ప్రభావం ఏర్పడుతుంది. దీన్ని నివారించడానికి సింగపూర్ ప్రభుత్వం ప్రత్యేకమైన కూల్ పెయింట్స్ వేసింది. ఈ పెయింట్స్ సూర్యరశ్మిని వెనక్కి పరావర్తనం చేస్తాయి. దీనివల్ల భవనాల లోపల ఉష్ణోగ్రత 2 డిగ్రీల సెల్సియస్ తగ్గింది. విద్యుత్ ఖర్చు లేకుండానే శీతలీకరణ సాధ్యమైంది.

రెండవది వర్టికల్ ఫారెస్ట్, గ్రీన్ స్పేసెస్. ప్రభుత్వం ప్రవేశపెట్టిన లష్ పథకం ద్వారా ఎత్తైన భవనాలను నిలువు అడవులుగా మార్చారు. గోడలు, పైకప్పులపై వేలాది మొక్కలు పెంచారు. ప్రస్తుతం 300 హెక్టార్లకు పైగా వర్టికల్ గార్డెన్స్ ఉన్నాయి. ఇవి నీడనివ్వడంతో పాటు ఉష్ణోగ్రతలను తగ్గిస్తున్నాయి. ఈ పచ్చదనం వల్ల భవనాల ఏసీ బిల్లులు 31 శాతం తగ్గాయని గణాంకాలు చెబుతున్నాయి. అదనంగా గాలి ప్రవాహాన్ని మెరుగుపరచడానికి బిల్డింగ్ల మధ్య విండ్ కారిడార్లు ఏర్పాటు చేశారు.

మూడవది డిజిటల్ ట్విన్ టెక్నాలజీ. శాస్త్రవేత్తలు ఒక వర్చువల్ నగరాన్ని తయారు చేశారు. ఈ సాఫ్ట్‌వేర్ నగరంలో వేడి ఎక్కడ కేంద్రీకృతమవుతుందో, ఏ భవనం వల్ల గాలి ఆగుతుందో ముందే గుర్తిస్తుంది. దీని ఆధారంగా పార్కులు నిర్మించడం, జాగ్రత్తలు తీసుకోవడం చేస్తారు. ఇది హీట్ వేవ్ ప్రమాదాన్ని ముందే అంచనా వేసే నెక్స్‌ట్ జెనరేషన్ క్లైమేట్ యాక్షన్.

వీటితో పాటు ప్రభుత్వం ప్రజలను ఏసీలను 25 డిగ్రీలు లేదా అంతకంటే ఎక్కువ ఉష్ణోగ్రతలో సెట్ చేసుకోవాలని, ఫ్యాన్‌తో కలిపి వాడాలని ప్రోత్సహిస్తోంది. దీనివల్ల విద్యుత్ ఆదా అవుతుంది.

భారతదేశంలో కూడా వాతావరణ శాఖ హీట్ యాక్షన్ ప్లాన్స్ అమలు చేస్తుంది. ముందస్తు హెచ్చరికలు జారీ చేస్తుంది. ఆసుపత్రుల్లో హీట్ స్ట్రోక్ వార్డులు ఏర్పాటు చేస్తున్నారు. కానీ ఇవి తాత్కాలిక చర్యలే. సింగపూర్ తీసుకున్న చర్యలు దీర్ఘకాలిక ప్రణాళికను సూచిస్తున్నాయి. భారతదేశం కూడా కూల్ పెయింట్స్, అర్బన్ ఫారెస్ట్, డిజిటల్ ట్విన్ వంటి స్మార్ట్ టెక్నాలజీని అవలంబించాల్సిన అవసరం ఉందని నిపుణులు అభిప్రాయపడుతున్నారు.