గ్రేటర్‌లో అధికారుల బదిలీలపై SIR ఎఫెక్ట్: తెలంగాణ సర్కార్ కీలక నిర్ణయం

తెలంగాణలో SIR ప్రక్రియ కారణంగా అధికారుల బదిలీలు మరింత ఆలస్యం కానున్నాయి. గ్రేటర్ హైదరాబాద్‌లో అధికారులందరూ SIR పనుల్లో నిమగ్నమైనందున, బదిలీలపై తెలంగాణ ప్రభుత్వం కీలకమైన నిర్ణయం తీసుకుంది.

SIR ప్రక్రియను ఎటువంటి అవరోధాలు లేకుండా పూర్తి చేయడమే లక్ష్యంగా ప్రభుత్వం ముఖ్యమైన ఆదేశాలు జారీ చేసింది. ఎన్నికల విధుల్లో ఉన్న ప్రతి అధికారి మరియు సిబ్బంది పూర్తిగా SIR ప్రక్రియకే పరిమితం కావాలని CS తన ఉత్తర్వుల్లో స్పష్టం చేశారు. అంతేకాక, ఎన్నికల విధుల్లో ఉన్న అధికారులను ఎన్నికల సంఘం అనుమతి లేకుండా బదిలీ చేయరాదని కూడా స్పష్టం చేశారు.

ఈ నిర్ణయంతో GHMC లో ఇప్పటికే నిలిచిపోయిన బదిలీలు మరింత జాప్యం అయ్యే అవకాశం ఉంది. SIR ప్రక్రియ అక్టోబర్ 1 వరకు కొనసాగనున్న నేపథ్యంలో, ఎన్నికల యంత్రాంగాన్ని పూర్తిగా వినియోగించుకోవాలని ప్రభుత్వం నిర్ణయించింది.

ERO లు, AERO లు, BLO లు మరియు BLO సూపర్‌వైజర్లకు ఎటువంటి సాధారణ ప్రభుత్వ విధులు అప్పగించవద్దని అన్ని శాఖలకు స్పష్టమైన ఆదేశాలు జారీ అయ్యాయి. ఎన్నికల జాబితా సవరణ పూర్తయ్యే వరకు వీరంతా ఎన్నికల విధులకే పరిమితం కానున్నారు.

GHMC పరిధిలో పనిచేస్తున్న టాక్స్ ఇన్స్పెక్టర్లు, బిల్ కలెక్టర్లు, జూనియర్ మరియు సీనియర్ అసిస్టెంట్లు, సూపరింటెండెంట్లు, ఇంజనీరింగ్ అధికారులతో సహా వివిధ విభాగాలకు చెందిన అధికారులకు SIR కింద సూపర్‌వైజర్ బాధ్యతలు అప్పగించారు. దీంతో మొత్తం యంత్రాంగం SIR ప్రక్రియపైనే కేంద్రీకృతమైంది. ఫలితంగా కొన్ని రెగ్యులర్ పనులు పెండింగ్‌లో ఉండిపోయాయి.

గ్రేటర్‌లో మూడు కార్పొరేషన్లు ఏర్పాటైన తర్వాత GHMC లో సిబ్బంది కొరత తీవ్రంగా ఉంది. ఇప్పటికే ట్రాన్స్‌ఫర్ ఆర్డర్లు జారీ అయినా వాటిని అమలు చేయలేదు. కొన్ని ప్రాంతాల నుంచి కార్పొరేషన్లకు వచ్చిన ఉద్యోగులను జాయిన్ చేసుకోలేదు. కొత్త పోస్టింగులు ఇచ్చినా రిలీఫ్ కాని అధికారులు చాలామంది ఉన్నారు.

తాజా సర్కులర్‌తో SIR ప్రక్రియ పూర్తయ్యే వరకు ప్రస్తుత స్థానాల్లోనే కొనసాగాల్సిన పరిస్థితి నెలకొంది. దాంతో మరికొన్ని రోజులపాటు అధికారుల కొరత గ్రేటర్ కార్పొరేషన్లను వేధించనుంది.

ఎన్నికల సంఘం ముందస్తు అనుమతి లేకుండా బదిలీలు చేపట్టరాదని ప్రభుత్వం మరోసారి స్పష్టం చేసింది. అత్యవసర సేవలకు మినహాయింపు ఇవ్వాల్సి వస్తే తెలంగాణ ప్రధాన ఎన్నికల అధికారి అనుమతి తీసుకోవాలని ఆదేశించింది. ఈ సర్కులర్‌ను అన్ని ప్రభుత్వ శాఖలు, జిల్లా కలెక్టర్లు, జిల్లా ఎన్నికల అధికారులు మరియు GHMC కమిషనర్ తప్పనిసరిగా అమలు చేయాలని స్పష్టం చేసింది.