SIR ప్రక్రియలో తీవ్ర గందరగోళం: ఎన్యుమరేషన్ ఫారం నింపడంలో ప్రజలు తిప్పలు పడుతున్నారు

తెలంగాణలో స్పెషల్ ఇంటెన్సివ్ రివిజన్ (SIR) ప్రక్రియ క్షేత్ర స్థాయిలో తీవ్ర గందరగోళంలో చిక్కుకుంది. బూత్ లెవెల్ అధికారులు (BLO) ప్రతి ఇంటికి వెళ్లి మాన్యువల్ గా సేకరించిన ఎన్యుమరేషన్ డేటాను GIS కోఆర్డినేట్స్ తో సహా BLO యాప్ లో డిజిటలైజ్ చేయాల్సి ఉంది. అయితే 2002 నాటి పాత ఓటర్ల బేస్ డేటాతో ప్రస్తుత రికార్డులను మ్యాపింగ్ చేయడం, సర్వర్ డౌన్ కావడం, OTP లు రాకపోవడం వంటి సాంకేతిక లోపాలు తీవ్రంగా తలెత్తుతున్నాయి.

ఆధార్ కార్డులో పేరు ఒకలా, పాత ఓటర్ కార్డులో మరోలా ఉండడం క్షేత్ర స్థాయిలో ఇబ్బందిగా మారింది. యాప్ డిజైన్ ప్రకారం ప్రతి అక్షరం డేటా ఖచ్చితంగా మ్యాచ్ అయితేనే తదుపరి విభాగానికి వెళ్తుంది. లేదంటే ప్రక్రియ అక్కడికక్కడే నిలిచిపోతుంది. దీంతో వేలాది మంది దరఖాస్తులు పెండింగ్ లో పడిపోతున్నాయి.

రాష్ట్రంలో ఇప్పటికే 89 లక్షలకు పైగా ఓటర్ రికార్డుల్లో తప్పులు ఉన్నట్టు అధికారులు గుర్తించారు. వీటిలో అత్యధికంగా 41,52,434 రికార్డుల్లో ఫోటో గుర్తింపు కార్డుల లోపాలు ఉన్నాయి. పట్టణ ప్రాంతాల్లో ఒకే ఇంటి నెంబర్ పై 10 కంటే ఎక్కువ ఓట్లు ఉండడం తీవ్ర సమస్యగా మారింది. రాష్ట్రవ్యాప్తంగా 26.14 లక్షల ఓట్లు ఈ కేటగిరీ కింద నమోదయ్యాయి. అలాగే పేర్లు, వయసు, తండ్రి లేదా భర్త పేర్లలో తప్పులున్న ఓటర్లు 16 లక్షల మంది ఉన్నట్టు తేలింది.

ఒకే వ్యక్తికి రెండు నియోజక వర్గాల్లో లేదా రెండు వేర్వేరు రాష్ట్రాల్లో ఓటు హక్కు ఉంటే, కొత్త ప్రాంతంలో ఓటు కావాలంటే పాత నియోజక వర్గంలో అన్ మ్యాపింగ్ చేసుకోవడం తప్పనిసరని అధికారులు స్పష్టం చేస్తున్నారు. అన్ మ్యాపింగ్ ప్రక్రియ ఆన్లైన్ లో త్వరగా అప్డేట్ కాకపోవడంతో ఓటర్లు తీవ్ర ఆందోళన చెందుతున్నారు.

తగినంత శిక్షణ లేకుండా BLO లను ఫీల్డ్ వెరిఫికేషన్ కు పంపడంతో యాప్ లో వచ్చే ఎర్రర్లను పరిష్కరించడం వారికి తెలియడం లేదు. నిరక్షరాశులు, సామాన్య ప్రజలు ఎన్యుమరేషన్ ఫారం నింపడంలో తీవ్ర ఇబ్బందులు పడుతున్నారు.

సోమవారం నాటికి రాష్ట్రవ్యాప్తంగా 1.73 కోట్ల ఎన్యుమరేషన్ ఫారాలను ఇంటింటికి పంపిణీ చేశారు. జూలై 31న డ్రాఫ్ట్ రోల్ విడుదల చేయనున్నారు. ఆగస్టు 1 నుంచి 30 వరకు పోలింగ్ కేంద్రాల దగ్గర నిర్వహించే ప్రత్యేక క్యాంపుల్లో BLO లకు నేరుగా Form 8 ఇచ్చి డాక్యుమెంట్లు స్కాన్ చేయించుకునే అవకాశం ఉంటుంది. అన్ని సాంకేతిక లోపాలను సరిదిద్దిన తర్వాత అక్టోబర్ 1 నాటికి తుది ఓటర్ల జాబితాను విడుదల చేస్తామని అధికారులు తెలిపారు.