రామలల్ల ప్రాణ ప్రతిష్ట ఖర్చులపై సిట్ దృష్టి – రామమందిర విరాళాల దుర్వినియోగం దర్యాప్తు

అయోధ్య రామమందిర ట్రస్ట్ విరాళాల దుర్వినియోగం కేసు దర్యాప్తులో భాగంగా స్పెషల్ ఇన్వెస్టిగేషన్ టీం (సిట్) ప్రధానంగా ప్రాణ ప్రతిష్ట వేడుకల ఖర్చులపై దృష్టి పెట్టింది. ట్రస్ట్ గత రెండేళ్లలో ప్రధాన కార్యక్రమాలకు ఎంత ఖర్చు చేసిందో ఆడిట్ నివేదికలు, బిల్లుల వివరాలు పరిశీలిస్తోంది.

2024 జనవరి 22న జరిగిన రామలల్ల ప్రాణ ప్రతిష్ట మహోత్సవానికి సుమారు 113 కోట్లు ఖర్చు చేసినట్లు ట్రస్ట్ రికార్డులు చెబుతున్నాయి. దీనికి 8,000 మంది అతిథులు హాజరయ్యారు. టెంట్ సిటీ నిర్మాణానికి 35.97 కోట్లు, అక్షత పూజన ప్రచారానికి 30.85 కోట్లు, ప్రకటనల ప్రచారానికి 21.77 కోట్లు, అలంకరణ, విద్యుత్ దీపాలంకరణకు 14.62 కోట్లు, ఆహార ఏర్పాట్లకు 5.11 కోట్లు, మతపరమైన పూజలకు 1.06 కోట్లు, భక్తి సంగీత కార్యక్రమాలకు 93 లక్షలు ఖర్చు చేసినట్లు లెక్కలు రాశారు. మొత్తం 124 కోట్ల రూపాయలకు పైగా ఖర్చు జరిగిందని ఆడిట్ నివేదికలో పేర్కొన్నారు.

2025 నవంబర్ 25న జరిగిన ధ్వజారోహణ కార్యక్రమానికి 10.12 కోట్లు ఖర్చు చేసినట్లు రికార్డులు ఉన్నాయి. ఈ కార్యక్రమానికి ప్రధాని నరేంద్ర మోదీ సహా 6,000 మంది హాజరయ్యారు. 2025 జనవరి 11-13 తేదీల్లో జరిగిన తొలి ప్రతిష్ట ద్వాదశి ఉత్సవాలకు 83 లక్షలు, మహాకుంభ సందర్భంగా భక్తుల ఏర్పాట్ల కోసం 43 లక్షలు ఖర్చు జరిగింది.

సిట్ అధికారులు ఈ ఖర్చులకు అవసరమైన అనుమతులు తీసుకున్నారా, చెల్లింపులు నిబంధనల ప్రకారం జరిగాయా అనే అంశాలపై విచారణ చేస్తున్నారు. బంగారం, వెండి విరాళాల నిల్వలు, భద్రత ఏర్పాట్లను కూడా వెరిఫై చేస్తున్నారు. ట్రస్ట్ లెక్కల ప్రకారం 2024 నవంబర్ నుంచి 2025 ఫిబ్రవరి వరకు 2.3 కిలోల బంగారం, 83.3 కిలోల వెండి విరాళంగా వచ్చాయి. మహాకుంభ సమయంలో భక్తులు 1.5 కిలోల బంగారం, 28 కిలోల వెండి సమర్పించారు.