సీతారామ ప్రాజెక్ట్: యాతాలకుంట టన్నెల్ పూర్తి, 1.5 లక్షల ఎకరాలకు గోదావరి నీళ్లు

సీతారామ ప్రాజెక్ట్‌లో కీలక దశ పూర్తయింది. సత్తుపల్లి ట్రంక్ కెనాల్ పరిధిలో నిర్మించిన యాతాలకుంట టన్నెల్ పనులు పూర్తయ్యాయి. ఈ టన్నెల్ పొడవు 1.8 కిలోమీటర్లు. వెడల్పు 5.2 మీటర్లు, ఎత్తు 2 మీటర్లు.

మెయిన్ కెనాల్‌లో 20.4 km నుంచి 22.2 km మధ్య ఈ టన్నెల్ నిర్మించారు. నిర్మాణానికి ₹130 కోట్లు ఖర్చయింది. 12 నెలల్లో పనులు పూర్తయ్యాయి.

సీతారామ ప్రాజెక్ట్‌లో 1 నుంచి 8 వరకు ప్యాకేజీ పనులు పూర్తయ్యాయి. ₹6,714 కోట్లతో 105 కిలోమీటర్ల మెయిన్ కెనాల్, మూడు పంప్ హౌసుల నిర్మాణం పూర్తయింది. ఇప్పుడు టన్నెల్ కూడా పూర్తి కావడంతో గోదావరి జలాల ప్రవాహానికి మార్గం సిద్ధమైంది.

సత్తుపల్లి ట్రంక్ కెనాల్ మెయిన్ కెనాల్ నిర్మాణం దాదాపు 80% పూర్తయింది. మరో నెల రోజుల్లో మిగిలిన పనులు పూర్తయ్యే అవకాశం ఉందని అధికారులు చెప్తున్నారు. ఇది పూర్తయితే సత్తుపల్లి, అశ్వరావుపేట నియోజకవర్గాల్లో 1.5 లక్షల ఎకరాలకు గోదావరి నీళ్లు అందుతాయి.

9 నుంచి 12 ప్యాకేజీల్లో సత్తుపల్లి ట్రంక్ కెనాల్ పనులు తుది దశకు చేరాయి. 13 నుంచి 16 ప్యాకేజీల్లో పాలేరు లింక్ కెనాల్ పనుల్లో జాప్యం జరుగుతోంది. మంత్రి తుమ్మల ఈ పనులపై నేరుగా దృష్టి పెట్టారు.

సీతారామ ప్రాజెక్ట్ ద్వారా ఖమ్మం జిల్లా 10 నియోజకవర్గాలతో పాటు మహబూబాబాద్ జిల్లా కొన్ని ప్రాంతాలకూ గోదావరి నీళ్లు ఇవ్వాలని ప్రభుత్వం లక్ష్యంగా పెట్టుకుంది. టన్నెల్ పనులు పూర్తయిన తర్వాత డిస్ట్రిబ్యూటర్ల నిర్మాణంపై ప్రభుత్వం దృష్టి సారించాల్సి ఉంది. గత ప్రభుత్వం సీతారామ ప్రాజెక్టును నిర్లక్ష్యం చేసిందని కాంగ్రెస్ నేతలు ఆరోపిస్తున్నారు. వీలైనంత త్వరగా ప్రాజెక్ట్ పూర్తి చేస్తామని వారు చెప్తున్నారు.