పరిగిలో ఆరేళ్ల బాలికపై రాళ్ల దాడి ఆరోపణ.. పోలీసుల విచారణ

శ్రీ సత్యసాయి జిల్లా పరిగి మండలంలో ఆరేళ్ల బాలికపై రాళ్లతో దాడి జరిగినట్లు కుటుంబ సభ్యులు ఆరోపించారు. తీవ్రంగా గాయపడిన బాలికను చికిత్స కోసం అనంతపురం ప్రభుత్వ ఆసుపత్రికి తరలించారు.

బాలిక జామపండ్లు కోసేందుకు వెళ్లిన సమయంలో ఓ వృద్ధురాలు రాళ్లతో దాడి చేసినట్లు బంధువులు చెబుతున్నారు. దాడి తర్వాత బాలికను ఇంట్లో మంచం వెనుక దాచి పెట్టినట్లు కుటుంబ సభ్యులు ఆరోపిస్తున్నారు. ఘటన సమయంలో బాలిక తండ్రి బెంగళూరులో ఉన్నారని, తల్లి ఆసుపత్రికి వెళ్లిన సమయంలో ఈ ఘటన జరిగినట్లు బంధువులు తెలిపారు.

బాలిక కనిపించకపోవడంతో కుటుంబ సభ్యులు గ్రామంలో వెతకగా, వృద్ధురాలి ఇంట్లో తీవ్ర గాయాలతో అపస్మారక స్థితిలో కనిపించింది. వెంటనే హిందూపురం ప్రభుత్వ ఆసుపత్రికి తరలించగా, మెరుగైన చికిత్స కోసం అనంతపురం ప్రభుత్వ ఆసుపత్రికి రిఫర్ చేశారు. ప్రస్తుతం బాలికకు ఆక్సిజన్ సహాయంతో చికిత్స అందిస్తున్నట్లు కుటుంబ సభ్యులు తెలిపారు. బాలిక పరిస్థితి ఆందోళనకరంగా ఉన్నట్లు సమాచారం.

ఘటనపై సమాచారం అందుకున్న పోలీసులు సంఘటనా స్థలాన్ని పరిశీలించారు. వృద్ధురాలిని అదుపులోకి తీసుకుని విచారిస్తున్నట్లు సమాచారం. దాడికి కారణాలపై దర్యాప్తు చేస్తున్నట్లు SI రవి కుమార్ తెలిపారు.