ఇంట్లోనే స్మార్ట్ హెల్త్ చెకప్‌లు: అందుబాటులో పరికరాలు, ధరల వివరాలు

ఇకపై రక్తపోటు, షుగర్, గుండె, కిడ్నీ పరీక్షల కోసం ప్రతిసారి ఆసుపత్రికి వెళ్లాల్సిన అవసరం తగ్గుతోంది. ఇంట్లోనే పూర్తి హెల్త్ రిపోర్ట్ పొందేందుకు అనేక స్మార్ట్ పరికరాలు మార్కెట్లో అందుబాటులో ఉన్నాయి. వీటి ధరలు రూ.1,000 నుంచి రూ.20,000 వరకు ఉన్నాయి.

All-in-one స్మార్ట్ హెల్త్ మానిటర్ BP, ECG, ఆక్సిజన్, గుండె వేగం, శరీర ఉష్ణోగ్రత, బ్లడ్ గ్లూకోజ్ రీడింగ్స్‌ను సెకన్లలో చూపుతుంది. ఈ పరికరం ధర రూ.18,000 నుంచి రూ.20,000 వరకు ఉంటుంది. Continuous Glucose Monitor (CGM) అనేది భుజం కింద అతికించే చిన్న సెన్సార్. ఇది 14 రోజుల పాటు షుగర్ స్థాయిలను నిరంతరం గమనిస్తుంది. సెన్సార్ రకాన్ని బట్టి నెలకు రూ.4,000 నుంచి రూ.8,000 వరకు ఖర్చవుతుంది.

కిడ్నీ మానిటరింగ్ స్ట్రిప్స్ మూత్రంలో ఇన్ఫెక్షన్, ప్రోటీన్ స్థాయిలు, కిడ్నీ పనితీరు, కాలేయం, హైడ్రేషన్ స్థాయిలను విశ్లేషించి రిపోర్టును ఫోన్ యాప్‌లో చూపిస్తాయి. గ్లూకోమా, కంటి ఒత్తిడి సమస్యలు ఉన్నవారికి ప్రత్యేక సెన్సార్ పరికరాలు అందుబాటులో ఉన్నాయి. ఇవి కంటి లోపలి ఒత్తిడిని ఎప్పటికప్పుడు గమనించి చూపు దెబ్బతినకుండా కాపాడతాయి.

స్మార్ట్ రింగ్‌లు ఉంగరంలా వేలికి తొడుక్కునే తేలికైన పరికరాలు. ఇవి శరీర ఉష్ణోగ్రత, గుండె వేగం, ప్రెజర్, స్లీప్ క్వాలిటీ నిరంతరం పర్యవేక్షిస్తాయి. బ్రాండ్ ఆధారంగా వీటి ధర రూ.7,000 నుంచి రూ.15,000 వరకు ఉంటుంది. పోర్టబుల్ ECG మానిటర్‌పై రెండు వేళ్లు ఉంచితే 20 సెకన్లలో ECG రిపోర్ట్ వస్తుంది. ఇది గుండె లయ తప్పుతుందో లేదో వెంటనే గుర్తిస్తుంది. దీని ధర రూ.3,500 నుంచి రూ.6,000 వరకు ఉంటుంది. బాడీ కంపోజిషన్ స్కేల్స్ బరువుతో పాటు BMI, కొవ్వు శాతం, కండరాల బరువు, నీటి శాతం వంటి 12 పారామీటర్లను తెలుపుతాయి. వీటి ధర రూ.1,000 నుంచి రూ.3,000 వరకు ఉంటుంది.