పాము కాటేసినా.. మెడలో ఆ పాముతోనే 14 కి.మీ బైక్ ప్రయాణం

ఛత్తీస్‌గఢ్ లోని కాంకేర్ జిల్లాకు చెందిన దేవ్‌జిత్ సర్కార్ గత ఎనిమిదేళ్లుగా స్నేక్ క్యాచర్‌గా పనిచేస్తున్నాడు. ఇటీవల ఆయన ఒక పామును పట్టుకునే ప్రయత్నంలో ఆ పాము ఆయన్ని కాటు వేసింది.

కాటు వేసిన పామును పట్టుకున్న దేవ్‌జిత్.. అది విషపూరితమైనదా కాదా అని తెలుసుకునేందుకు ఆ పామును మెడలో వేసుకొని బైక్‌పై 14 కిలోమీటర్లు ప్రయాణించి ఆసుపత్రికి చేరుకున్నాడు.

ఆసుపత్రిలో వైద్యులు ఆ పామును పరిశీలించి, అది విషపూరితం కాదని గుర్తించారు. దీంతో పాముకాటు వల్ల పెద్ద ప్రమాదం తప్పింది. డాక్టర్ సంజిత్ వైష్ణవ్ మాట్లాడుతూ, యువకుడికి చికిత్స అందించామని, ఆయన త్వరగా కోలుకున్నారని తెలిపారు.

అయితే పామును మెడలో వేసుకొని ఆసుపత్రికి రావడం సరికాదని వైద్యులు హెచ్చరించారు. పాము విషపూరితమైనది అయితే పరిస్థితి తీవ్రంగా మారేదని అన్నారు.