పెళ్లి ఘనంగా చేయలేదని మామపై కత్తితో దాడి; పెనుకొండలో దారుణం

పెనుకొండ, శ్రీ సత్యసాయి జిల్లాలోని ఇస్లాపురం గ్రామంలో అల్లుడు తమ పెళ్లి ఘనంగా చేయలేదనే కోపంతో మామపై కత్తితో దాడి చేశాడు. ఆంజనేయులు అనే వ్యక్తిపై అతని అల్లుడు లోకేష్ ఈ దాడికి పాల్పడ్డాడు.

ఆంజనేయులు, భారతి దంపతుల పెద్ద కుమార్తెను నాలుగేళ్ల క్రితం లోకేష్‌కు ఇచ్చి వివాహం చేశారు. అప్పటి నుంచి లోకేష్ భార్యతో గొడవపడుతున్నాడని, ఇటీవల లక్షలు వెచ్చించి బులెట్ వాహనం కూడా కొనిచ్చినా సంతృప్తి చెందలేదని బాధితుడి భార్య భారతి తెలిపారు.

గురువారం ఆంజనేయులు ద్విచక్ర వాహనంపై వెళ్తుండగా లోకేష్ కత్తితో దాడి చేశాడు. తీవ్ర రక్తస్రావంతో కిందపడిన అతన్ని స్థానికులు పెనుకొండ ప్రభుత్వ వైద్యశాలకు తరలించారు. ప్రాథమిక చికిత్స అనంతరం మెరుగైన వైద్యం కోసం అనంతపురంకు తరలించారు. దాడిలో లోకేష్ తమ్ముడు కూడా ఉన్నాడని భారతి ఆరోపించారు. పెనుకొండ పోలీసులు కేసు నమోదు చేసి దర్యాప్తు చేస్తున్నారు.