సూర్యాపేట ఎస్పీ నరసింహ విద్యార్థులకు సాంఘిక శాస్త్రం పాఠాలు బోధన

తాజాగా సూర్యాపేట జిల్లా ఎస్పీ నరసింహ సూర్యాపేట పట్టణంలోని ప్రభుత్వ ఉన్నత పాఠశాలను సందర్శించారు.

ఈ సందర్భంగా ఆయన విద్యార్థులకు సాంఘిక శాస్త్రం పాఠాలు బోధించారు. అక్షాంశ, రేఖాంశాల గురించి, సూర్య కిరణాల ప్రభావం గురించి సులభమైన ఉదాహరణలతో వివరించారు. విద్యార్థులను ప్రశ్నలు అడుగుతూ సమాధానాలు రాబట్టారు, దీంతో తరగతి ఉత్సాహభరితంగా సాగింది.

నరసింహ గతంలో టీచర్‌గా పనిచేసిన అనుభవం ఉంది. పోలీసు అధికారిగా చేరిన తర్వాత కూడా ఆయన విద్యార్థులతో సంభాషించడాన్ని ఆస్వాదించారు. అదే స్కూల్‌లో పనిచేస్తున్న టీచర్ హరిత తన కొడుకును అదే పాఠశాలలో చదివిస్తున్నారని తెలుసుకుని ఆమెను అభినందించారు. “మీలాంటి టీచర్లు సమాజానికి ఆదర్శం” అని మెచ్చుకున్నారు.

అనంతరం విద్యార్థులకు మంచి మాటలు చెప్పారు. “బాగా చదువుకొని తల్లిదండ్రులను గర్వపడేలా చేయాలి” అని సూచించారు. ఈ సందర్శన విద్యార్థులు, టీచర్లలో స్ఫూర్తిని నింపింది.