హైదరాబాద్: అంగవైకల్యంతో రాపిడో బైక్ నడుపుతూ కుటుంబం కోసం పోరాడుతున్న సందీప్ భాటి

హైదరాబాద్ ఓల్డ్ సిటీకి చెందిన సందీప్ భాటి (34) అరుదైన శారీరక స్థితి ఉన్నా రాపిడో బైక్ ట్యాక్సీ డ్రైవర్‌గా పనిచేస్తున్నారు. ఆయన కాళ్లు సి ఆకారంలో వంకరగా ఉండటంతో పాటు ఎత్తు చాలా తక్కువ. నిలబడటం, కూర్చోవడం కూడా కష్టమే.

సందీప్ చిన్నప్పుడే తల్లి చనిపోయారు. ఆపై ఒకటిన్నరేండ్ల తర్వాత తండ్రి కూడా మృతి చెందారు. దీంతో ఒంటరిగా పెరిగారు. కొంతకాలం బటర్ షాప్‌లో పనిచేశారు. కరోనా సమయంలో ఉద్యోగం కోల్పోయి, స్నేహితుడు నితిన్ ఒజా సాయంతో యాక్టివా 125 స్కూటర్ కొనుగోలు చేశారు. అది హ్యాండీక్యాప్ వాహనంగా మార్చబడింది. EMI ద్వారా నెలవారీ చెల్లింపు చేస్తూ రాపిడో డ్రైవింగ్ ప్రారంభించారు.

ప్రతిరోజు ఉదయం 6:30 నుంచి అర్ధరాత్రి 12:30 వరకు రైడ్స్ చేస్తారు. ఎక్కువగా హైటెక్ సిటీ, మాదాపూర్, షాపూర్, రామోజీ ఫిల్మ్ సిటీ ప్రాంతాల్లో తిరుగుతారు. ఆదాయం రోజుకు రూ.200-500 మధ్య ఉంటుంది. పెట్రోల్ ఖర్చు తర్వాత సగటున రూ.300-500 మిగులుతుంది. వికలాంగుల పెన్షన్ కింద రూ.4,000 ప్రభుత్వం నుంచి అందుతోంది. దాన్ని రూ.6,000కు పెంచుతామని అధికారులు చెప్పినా ఇంకా పెంచలేదు.

చాలామంది కస్టమర్లు రైడ్ బుక్ చేసుకొని, స్కూటర్ ప్రత్యేకత చూసి క్యాన్సల్ చేస్తారు. కొంతమంది అసభ్యంగా మాట్లాడతారు. అయినా సందీప్ 1,800కి పైగా రైడ్స్ పూర్తి చేశారు. యాప్‌లో ఆయన రేటింగ్ 4.6గా ఉంది. ఒకసారి ఓ కస్టమర్ సగం దూరం వెళ్లాక రద్దు చేసి ఇబ్బంది పెట్టాడు. కానీ మరికొంతమంది సానుకూలంగా స్పందించి, అదనంగా డబ్బులు ఇస్తారు.

సందీప్ పదో తరగతి పూర్తి చేశారు. ఆఫీస్‌లో చిన్న చిన్న పనులు, టీ కాఫీ అందించడం వంటి ఆఫీస్ బాయ్ ఉద్యోగం చేస్తే నెలకు రూ.15,000-20,000 సంపాదించుకోవచ్చని ఆశిస్తున్నారు. కానీ ఎత్తు, శారీరక పరిస్థితి కారణంగా ఎవరూ ఇంతవరకు ఉద్యోగం ఇవ్వలేదు. ఎంఐఎం కార్యాలయంలో లేఖ ఇచ్చినా స్పందన రాలేదు. గతంలో నిస్సహాయ స్థితిలో ఖైరతాబాద్ గణేష్ విగ్రహం దగ్గర భిక్షాటన కూడా చేశారు.

సందీప్ చెప్పిన దాని ప్రకారం, దేవుడిపై నమ్మకం ఒక్కటే ఆయనను నడిపిస్తోంది. కష్టాలు ఎన్ని ఉన్నా, స్థిరమైన ఉద్యోగం కోసం ఎదురుచూస్తున్నారు. ఇలాంటి స్థితిలోనూ తాను ఇతరులకు స్ఫూర్తిగా నిలవాలని కోరుకుంటున్నారు.