స్వాతి నక్షత్రం సందర్భంగా అహోబిల క్షేత్రంలో ప్రత్యేక పూజలు

అహోబిల క్షేత్రంలో స్వాతి నక్షత్రం సందర్భంగా ప్రత్యేక పూజలు నిర్వహించారు. శ్రావణ మాసంలో వచ్చిన ఈ పర్వదినాన్ని ఆలయంలో ప్రత్యేకంగా నిర్వహించారు.

ఉదయం 5 గంటలకు మూలవిరాట్టుకు నవకలశాలతో పంచామృత అభిషేకం జరిగింది. అనంతరం నిత్య పూజలు నిర్వహించారు.

ఉదయం 9 గంటల నుంచి మధ్యాహ్నం 1 గంట వరకు ప్రత్యేక హోమాలు జరిగాయి. లక్ష్మీ నరసింహ మహామంత్రం, జ్వాలా నరసింహ మహామంత్రం, సుదర్శన మహామంత్రం, ధన్వంత్రి మహామంత్రం జపించారు. శ్రీసూక్త, పురుషసూక్త జప హోమాలు కూడా నిర్వహించారు.

స్వాతి నక్షత్రం రోజు నవ నరసింహ స్వామి ఆలయాలను ప్రదక్షిణ చేస్తే ప్రపంచ ప్రదక్షిణ ఫలం లభిస్తుందని పురాణాల్లో ఉందని అర్చకులు తెలిపారు. ఈ నేపథ్యంలో భక్తులు నవ నరసింహ క్షేత్రాలను దర్శించారు.

ఈ పూజలకు స్థానిక జిల్లాలతో పాటు కర్ణాటక, తమిళనాడు నుంచి భక్తులు వచ్చారు. భక్తులకు సంతానం, సంపద, ఆరోగ్యం కలగాలని అర్చకులు ప్రత్యేక ప్రార్థనలు చేశారు.