ఏపీలో ప్రత్యేక ఓటరు జాబితా సవరణ కార్యక్రమం ప్రారంభం - వివేక్ యాదవ్

ఆంధ్రప్రదేశ్‌లో నేడు ప్రత్యేక ఓటరు జాబితా సవరణ కార్యక్రమం ప్రారంభమైంది. ఏపీ చీఫ్ ఎన్నికల అధికారి వివేక్ యాదవ్ మాట్లాడుతూ జూలై 14 వరకు బూత్ లెవెల్ అధికారులు ఇంటింటికి వెళ్తారని తెలిపారు. ప్రతి ఓటరు ఇంటికి కనీసం మూడుసార్లు వెళ్ళాలని BLO లకు ఆదేశాలు జారీ చేశారు.

BLO లు ఓటర్ల ఇళ్లకు వెళ్ళేటప్పుడు ముందే నింపిన ఎన్యుమరేషన్ ఫారాలను అందజేస్తారు. ఆ ఫారాల్లో 2002 ఎలక్టోరల్ రోల్ వివరాలు ఉంటాయి. ఓటర్లు తమ రంగుల ఫోటో మరియు సంతకంతో ఆ ఫారాలను తిరిగి BLO కు అందించాలని సూచించారు. సేకరించిన వివరాలను BLO కార్యాలయంలో డిజిటలైజ్ చేస్తారని వివేక్ యాదవ్ వెల్లడించారు.

జూలై 21, 2026 న డ్రాఫ్ట్ ఎలక్టోరల్ రోల్ ప్రచురించనున్నారు. ఆ తర్వాత డ్రాఫ్ట్ జాబితాపై ఒక నెల పాటు క్లెయిమ్‌లు మరియు అభ్యంతరాలు స్వీకరిస్తామని స్పష్టం చేశారు. ఓటర్ల వివరాలు సరిగ్గా నమోదు అయ్యేలా చూసుకోవడమే ఈ కార్యక్రమం లక్ష్యమని అధికారులు పేర్కొన్నారు.