గౌతమ్ గంభీర్ కోచింగ్ విధానంపై శ్రీశాంత్ తీవ్ర విమర్శలు; ధోనీ లాంటి మెంటర్ అవసరమన్న మాజీ పేసర్

టీం ఇండియా హెడ్ కోచ్ గౌతమ్ గంభీర్ కోచింగ్ శైలిపై మాజీ పేసర్ శ్రీశాంత్ తీవ్ర విమర్శలు చేశారు. ఒక ఇంటర్వ్యూలో ఆయన మాట్లాడుతూ, గంభీర్ కఠినంగా వ్యవహరిస్తున్నారని, ఆటగాళ్లపై ఒత్తిడి పెడుతున్నారని ఆరోపించారు. టీం ఇండియాకు ఇప్పుడు కఠినమైన కోచ్ కాకుండా పెద్దన్నలా ఉండే మెంటర్ అవసరమని, ఎమ్మెస్ ధోనీ లాగే ఆటగాళ్లకు సపోర్టుగా ఉండే కోచ్ ఉండాలని చెప్పారు.

గెలిచినప్పుడు నవ్వి, ఓడిపోయినప్పుడు ప్లేయర్లపై కోప్పడే కోచ్ మనకు వద్దని శ్రీశాంత్ అన్నారు. ధోనీ కెప్టెన్‌గా, మెంటర్‌గా ఉన్నప్పుడు ఎప్పుడూ అలాంటి ఒత్తిడి పెట్టలేదని గుర్తుచేశారు. ఇటీవల భారత్ గెలిచిన టి20 ప్రపంచ కప్ 2026 విజయానికి సంబంధించి కూడా శ్రీశాంత్ ప్రశ్నలు లేవనెత్తారు. ఈ విజయానికి కోచ్ కంటే ఆటగాళ్లు పడిన శ్రమే కారణమని, ముఖ్యంగా సంజూ శాంసన్ అద్భుత ప్రదర్శన, కెప్టెన్ సూర్యకుమార్ యాదవ్ బౌలింగ్ మార్పులు కీలకమని పేర్కొన్నారు.

గంభీర్ కోచ్‌గా వచ్చినప్పటి నుంచి టీం ఇండియా టెస్ట్ క్రికెట్‌లో ఘోరంగా విఫలమవుతోందని శ్రీశాంత్ ఎత్తి చూపారు. ప్రపంచ టెస్ట్ ఛాంపియన్‌షిప్ ఫైనల్‌కు అర్హత సాధించలేకపోవడం, స్వదేశంలో న్యూజిలాండ్ చేతిలో 0-2 తో వైట్‌వాష్, ఆ తర్వాత సౌతాఫ్రికాపై 0-2 తో సిరీస్ ఓటమిని గుర్తు చేశారు. ఈ పరాజయాలకు గంభీర్ వ్యూహాలే కారణమని విమర్శించారు.

అదే ఇంటర్వ్యూలో శ్రీశాంత్ మాజీ స్పిన్నర్ హర్భజన్ సింగ్‌కు సరదాగా ఫైటింగ్ సవాలు విసిరారు. ఐపీఎల్‌లోని చెంపదెబ్బ ఘటనను గుర్తు చేస్తూ, నిజంగా దమ్ము ఉంటే రింగ్‌లోకి రావాలని ఛాలెంజ్ చేశారు. ప్రస్తుతం తాను బేర్ నకిల్ ఫైట్ లీగ్‌తో టచ్‌లో ఉన్నానని, అంతర్జాతీయ ఫైటర్లతో కలిసి శిక్షణ పొందుతున్నానని చెప్పారు. శ్రీశాంత్ చేసిన ఈ వ్యాఖ్యలు సోషల్ మీడియాలో వైరల్‌గా మారాయి.