నెదర్లాండ్స్‌లో ధర్మస్థాపన రథం ఆధ్వర్యంలో శ్రీనివాస కళ్యాణం

నెదర్లాండ్స్‌లోని ఐండ్‌హోవెన్ (Eindhoven) నగరంలో ధర్మస్థాపన రథం అనే ఆధ్యాత్మిక సంస్థ శ్రీనివాస కళ్యాణాన్ని నిర్వహించింది. స్థానిక అట్లాంటా స్పోర్ట్స్ క్లబ్ లో జరిగిన ఈ కార్యక్రమానికి సుమారు 1500 మంది భక్తులు హాజరయ్యారు. ఈ కళ్యాణాన్ని అర్చకులు నరేష్ నిర్వహించారు. కార్యక్రమంలో ఉపయోగించిన శ్రీనివాసుని విగ్రహాన్ని లక్సంబర్గ్‌కు చెందిన కరుణాకర్ అనే భక్తుడు మూడు సంవత్సరాల క్రితం తయారు చేశారు. ఇది తిరుమల వెంకటేశ్వర స్వామి విగ్రహాన్ని పోలి ఉందని భక్తులు తెలిపారు.

ధర్మస్థాపన రథం గురించి నిర్వాహకులు వివరాలు వెల్లడించారు. ఈ సంస్థ మూడు సంవత్సరాల క్రితం ప్రారంభమైంది. యూరప్ లో ఇప్పటివరకు 59 శ్రీనివాస కళ్యాణాలు, 25 సీతారామ కళ్యాణాలు నిర్వహించింది. అంతేకాకుండా, ధర్మస్థాపన గురుకులం ద్వారా 250 మంది విద్యార్థులకు వేదాలు, శ్లోకాలు, స్తోత్రాలు ఉచితంగా నేర్పిస్తున్నారు. ప్రస్తుతం 10 బ్యాచ్‌లు కొనసాగుతున్నాయి.

ఈ కార్యక్రమం పూర్తిగా ఉచితం. భక్తుల కోసం నగరంలోని ఒక ప్రముఖ హోటల్ యాజమాన్యం ఉచిత భోజన సౌకర్యం కల్పించింది. కార్యక్రమ నిర్వాహణలో వాలంటీర్లు కీలక పాత్ర పోషించారు. ఆహారం, వేదిక అలంకరణ, ప్రణాళిక వంటి అన్ని విభాగాల్లో వారి సహకారం ఉన్నట్లు నిర్వాహకులు చెప్పారు. ‘దేవుడి దగ్గరికి వెళ్ళేందుకు డబ్బు అవసరం లేదన్న భావనతో ఈ కార్యక్రమాన్ని ఉచితంగా నిర్వహించాలన్నది మా సంకల్పం’ అని ఒక నిర్వాహకుడు వ్యాఖ్యానించారు. యూరప్ లో తరువాతి తరానికి భారతీయ సంప్రదాయాలను అందించేందుకు ఇలాంటి కార్యక్రమాలు తోడ్పడతాయని అన్నారు.