శ్రీశైలం జలాశయానికి భారీ వరద: నీటిమట్టం 877 అడుగులు, గేట్లు త్వరలో తెరుచుకునే అవకాశం

శ్రీశైలం జలాశయం నీటి నిల్వలు క్రమంగా పెరుగుతున్నాయి. ప్రస్తుతం నీటిమట్టం 877 అడుగులకు చేరగా, పూర్తి స్థాయి నీటిమట్టం 885 అడుగులు. ప్రాజెక్టు పూర్తి నిల్వ సామర్థ్యం 215.81 టీఎంసీలు కాగా ప్రస్తుతం 177 టీఎంసీల నీరు నిల్వ ఉంది.

కర్ణాటకలోని ఆల్మట్టి, నారాయణపూర్ ప్రాజెక్టుల నుంచి వరద ప్రవాహం కొనసాగుతోంది. ఎగువ నుంచి శ్రీశైలానికి 1,92,000 క్యూసెక్కుల ప్రవాహం వస్తుండగా, విద్యుత్ ఉత్పత్తి ద్వారా 62,000 క్యూసెక్కుల నీటిని నాగార్జున సాగర్ కు విడుదల చేస్తున్నారు. వరద ప్రవాహం ఇలానే కొనసాగితే మరో 4-5 రోజుల్లో డ్యామ్ పూర్తి సామర్థ్యానికి చేరుకుని గేట్లు తెరిచే అవకాశం ఉందని అధికారులు అంచనా వేస్తున్నారు.

కర్ణాటకలో వర్షాలు తగ్గడంతో ఆల్మట్టి డ్యామ్‌కు 1.15 లక్షల క్యూసెక్కుల ప్రవాహం వస్తున్నది. నారాయణపూర్‌ నుంచి జూరాలకు 1.73 లక్షల క్యూసెక్కులు వచ్చి, అక్కడ నుంచి శ్రీశైలానికి 1.71 లక్షల క్యూసెక్కులు విడుదలవుతున్నాయి. భీమా ఉపనది నుంచి 80,000 క్యూసెక్కుల వరద ప్రవాహం, తుంగభద్ర జలాశయానికి లక్ష క్యూసెక్కుల పైగా వరద వస్తోంది. తుంగభద్ర నీటి నిల్వ 70 టీఎంసీలకు చేరుకుంది.

నాగార్జున సాగర్ ప్రాజెక్టుకు శ్రీశైలం నుంచి విద్యుత్ ఉత్పత్తి ద్వారా నీరు వస్తోంది. ప్రస్తుతం నాగార్జున సాగర్ నీటి మట్టం 517 అడుగులుగా ఉండగా, నిల్వ 145 టీఎంసీలకు చేరుకుంది. గత మూడు రోజుల్లో 9 టీఎంసీల నీరు చేరింది. కాగా, వాతావరణ శాఖ వారం రోజుల పాటు భారీ వర్షాలు కురిసే అవకాశం ఉందని తెలిపింది.