శ్రీశైలం జలాశయం నీటి నిల్వ 100 టీఎంసీలు దాటింది

శ్రీశైలం జలాశయంలో నీటి నిల్వ గురువారం ఉదయం 11 గంటలకు 100 టీఎంసీల మార్కు దాటింది. ఎగువ ప్రాంతాల్లో కురిసిన భారీ వర్షాలతో ఆలమట్టి, నారాయణపూర్ నుంచి భారీగా వరద నీరు వచ్చి చేరుతోంది.

నీటిపారుదల శాఖ అధికారుల ప్రకారం, ప్రస్తుతం జలాశయంలో 101.92 టీఎంసీల నీరు నిల్వ ఉంది. ఇన్ఫ్లో 2,85,594 క్యూసెక్కులు కాగా, అవుట్ఫ్లో కేవలం 800 క్యూసెక్కులు మాత్రమే. నీటి మట్టం 858 అడుగులకు చేరింది, గరిష్ట నీటి మట్టం 885 అడుగులు.

గత నెల 27న జలాశయంలో కేవలం 41 టీఎంసీల నీరు మాత్రమే ఉండగా, వారం రోజుల్లోనే 60 టీఎంసీలకు పైగా నీరు చేరింది. వరద ప్రవాహం మరో 4-5 రోజులు కొనసాగుతుందని, దీంతో నిల్వ 148-150 టీఎంసీలకు చేరే అవకాశం ఉందని అధికారులు అంచనా వేస్తున్నారు.

నీటి మట్టం 854 అడుగులు దాటితే పోతిరెడ్డిపాడు హెడ్ రెగ్యులేటర్ నుంచి ఇతర ప్రాజెక్టులకు నీరు విడుదల చేసే అవకాశం ఉంది. అలాగే 810 అడుగులకు ముత్తుమరి, 838 అడుగులకు మల్యాల నుంచి హంద్రీ నీవా సాగునీటి పథకానికి నీరు విడుదల చేస్తారు. ప్రస్తుతం ఏ ప్రాజెక్టుకూ నీరు విడుదల చేయకుండా, జలాశయం పూర్తి సామర్థ్యానికి చేరే వరకు వేచి చూడాలని అధికారులు నిర్ణయించారు. వరద పూర్తయిన తర్వాతే నీటి విడుదలపై తుది నిర్ణయం తీసుకుంటామని తెలిపారు.