శ్రీశైలం ఆలయ అర్చకుడు అమర్నాథ్‌పై బ్లేడ్‌తో దాడి

శ్రీశైలం ఆలయ అర్చకుడు అమర్నాథ్‌పై గుర్తు తెలియని వ్యక్తులు బ్లేడ్‌తో దాడి చేశారు. ఆయన విధి నిర్వహణకు వెళ్తుండగా, వర్క్‌షాప్ వద్ద ఈ దాడి జరిగింది. అమర్నాథ్ పొట్ట మీద, తల మీద బ్లేడ్ గాయాలు అయ్యాయి.

ఆయన గట్టిగా అరవడంతో దాడి చేసిన వ్యక్తులు పారిపోయారు. అమర్నాథ్‌ను స్థానిక సున్నిపంట ప్రభుత్వ ఆస్పత్రికి తరలించి చికిత్స అందించారు. ప్రాణాపాయం తప్పిందని తెలుస్తోంది.

ఈ దాడి వెనుక ఆలయ ఉప ప్రధాన అర్చకులు మట్టం శివశంకర్ స్వామి హస్తం ఉందని అమర్నాథ్ ఆరోపిస్తున్నారు. అర్చకుల మధ్య కొంతకాలంగా ఉన్న విభేదాలే కారణమని ఆయన చెప్తున్నారు. అయితే ఈ ఆరోపణలను ఎవరూ అధికారికంగా ధృవీకరించలేదు.

ఆలయ అధికారులు ఈ ఘటనపై స్పందన తెలియాల్సి ఉంది. పోలీసులు కేసు దర్యాప్తు చేస్తున్నారు.