శ్రీశైలం ట్రస్ట్‌ బోర్డు కీలక నిర్ణయాలు: సాలు మండపాల టెండర్లు వాయిదా, ప్రోటోకాల్ దర్శనాల్లో మార్పులు

శ్రీశైలం ఆలయ తొమ్మిదవ ధర్మకర్తల మండలి సమావేశం ఇవాళ జరిగింది. మొత్తం 45 అంశాలు చర్చకు వచ్చాయి. వీటిలో 39 అంశాలకు ఆమోదం లభించగా, 6 అంశాలను బోర్డు వాయిదా వేసింది.

భక్తులు ఎదురుచూస్తున్న సాలు మండపాల టెండర్ల నిర్ణయాన్ని బోర్డు వాయిదా వేసింది. గతంలో రెండు సార్లు ఈ ప్రతిపాదనను తిరస్కరించారు. టెండర్లకు మూడు కంపెనీలు దరఖాస్తు చేసుకున్నాయి. భక్తుల కోసం ముందుగా టాయిలెట్లు, క్యూ కాంప్లెక్స్, అమినిటీస్ సెంటర్ వంటి మౌలిక సదుపాయాలు పూర్తి చేసిన తర్వాతే సాలు మండపాల నిర్మాణంపై నిర్ణయం తీసుకోవాలని బోర్డు అభిప్రాయపడింది.

ఆగస్టు 15 నుంచి ప్రోటోకాల్ దర్శనాల విధానంలో మార్పులు అమలు చేయనున్నట్లు బోర్డు ఛైర్మన్ పోతుగుంట రమేష్ నాయుడు తెలిపారు. టీటీడీ తరహాలో సిఫార్సు లేఖలను కనీసం 48 గంటల ముందుగా పంపించాల్సి ఉంటుంది. ఆమోదం లభించిన భక్తులకు ఆన్‌లైన్‌లో మెసేజ్ వస్తుంది. ఆన్‌లైన్‌లోనే చెల్లింపు చేసి, టికెట్ డౌన్‌లోడ్ చేసుకుని దర్శనానికి రావాల్సి ఉంటుంది.

వర్షాభావ పరిస్థితులు తగ్గించేందుకు ఈ నెల 7 నుంచి 11 వరకు వరుణయాగం, సహస్ర ఘటాభిషేకం నిర్వహిస్తున్నట్లు ఛైర్మన్ వివరించారు. శాకంబరి ఉత్సవాలు, శ్రావణ మాసోత్సవాల నిర్వహణపై కూడా చర్చించారు. కడప జిల్లాలోని దత్తత దేవాలయమైన జ్యోతి సిద్ధవటేశ్వర ఆలయంలో అభివృద్ధి పనులు చేపట్టాలని బోర్డు నిర్ణయించింది.