సీక్వెల్ ప్రకటించినా నిలిచిపోయిన చిత్రాలు: దేవర నుండి బ్రహ్మాస్త్ర వరకు

ఇటీవల సినీ ఇండస్ట్రీలో సినిమా విడుదలకు ముందే సీక్వెల్‌లను ప్రకటించే ట్రెండ్ కనిపిస్తోంది. అయితే మొదటి భాగం ఊహించిన స్థాయిలో ఫలితం ఇవ్వకపోవడం లేదా ఇతర కారణాల వల్ల ఆ సీక్వెల్స్ అమలు కావడం లేదు. ఇలా ప్రకటించినా సగంలోనే ఆగిపోయిన కొన్ని చిత్రాల వివరాలు ఇక్కడ చూడొచ్చు.

NTR నటించిన ‘దేవర’ భారీ విజయం సాధించినప్పటికీ, పార్ట్ 2 పై సందిగ్ధత నెలకొంది. దర్శకుడు కొరటాల శివ ప్రస్తుతం బాలకృష్ణ సినిమాతో బిజీగా ఉన్నారు. NTR డ్రాగన్ మరియు త్రివిక్రమ్ సినిమాలకు కట్టుబడ్డారు. మేకర్స్ సీక్వెల్ వస్తుందని చెబుతున్నా, ప్రస్తుత పరిస్థితుల్లో అది సాధ్యం కాదని ఫిల్మ్ నగర్ వర్గాలు అంటున్నాయి.

పవన్ కల్యాణ్ హీరోగా వచ్చిన ‘హరిహర వీరమల్లు’ సినిమాకు విడుదలకు ముందే సీక్వెల్ ప్రకటించారు. కానీ ఈ చిత్రం ఆశించిన స్థాయిలో విజయం సాధించకపోవడంతో సీక్వెల్ నిలిచిపోయింది.

విజయ్ దేవరకొండ హీరోగా గౌతమ్ తిన్ననూరి దర్శకత్వంలో వచ్చిన ‘కింగ్డమ్’ చిత్రానికి కూడా సీక్వెల్ ఉంటుందని ముందే చెప్పారు. అయితే ఫస్ట్ పార్ట్ ఫలితం నిరాశపరచడంతో నిర్మాత నాగవంశీ సీక్వెల్ ఉండదని స్పష్టం చేశారు. దర్శకుడు గౌతమ్ కూడా ‘కింగ్డమ్’ విజయవంతమైతేనే సీక్వెల్ ఉంటుందని ముందే చెప్పినట్లు సినీ వర్గాలు తెలిపాయి.

రవితేజ నటించిన ‘రామారావు ఆన్ డ్యూటీ’ చిత్రానికి కూడా సీక్వెల్ ప్రకటించారు. కానీ సినిమా ఫలితం తర్వాత దాన్ని పక్కనపెట్టారు. బాలీవుడ్ నుంచి అయన్ ముఖర్జీ దర్శకత్వంలో వచ్చిన ‘బ్రహ్మాస్త్ర’ సినిమాకు విడుదలకు ముందే పార్ట్ 2 ను ప్రకటించారు. కానీ సినిమా సగటు ఫలితం రావడంతో ప్రస్తుతం సీక్వెల్ హోల్డ్‌లో ఉంది.