జగన్ అసెంబ్లీకి హాజరు కావాలని స్పీకర్ అయ్యన్న పాత్రుడు విజ్ఞప్తి; రాని ఎమ్మెల్యేల జీతం కట్‌పై కేంద్రానికి లేఖ

ఏపీ అసెంబ్లీ స్పీకర్ అయ్యన్న పాత్రుడు మాజీ ముఖ్యమంత్రి వై.ఎస్. జగన్ మోహన్ రెడ్డిని అసెంబ్లీ సమావేశాలకు హాజరు కావాలని కోరారు. ప్రజలు తమ సమస్యలు అసెంబ్లీలో చర్చించి పరిష్కారం చేస్తారనే ఉద్దేశంతో జగన్‌ను ఎమ్మెల్యేగా ఎన్నుకున్నారని ఆయన గుర్తు చేశారు.

ఇకపై అసెంబ్లీలో ఎమ్మెల్యేలకు కేటాయించిన సీట్లలో కూర్చుంటే ఆటోమేటిక్‌గా కెమెరాలు ఆన్ అవుతాయని, అలా హాజరైతేనే లెక్కలోకి తీసుకుంటామని స్పీకర్ తెలిపారు. అసెంబ్లీకి హాజరు కాని ఎమ్మెల్యేల జీతం వెనక్కి తీసుకునేలా పార్లమెంటు చట్టం చేయాలని కేంద్ర ప్రభుత్వాన్ని కోరినట్లు చెప్పారు. దీనిపై ఇప్పటికే కేంద్రానికి లేఖ రాసినట్లు తెలిపారు.

ప్రస్తుతం జగన్ మోహన్ రెడ్డి సీఎం కాదు, ప్రతిపక్ష నేత కూడా కాదు. ఆయన పార్టీకి 11 సీట్లు వచ్చాయి. కేవలం ఒక ఎన్నికైన ఎమ్మెల్యేగా ఆయన విధుల్లో భాగంగా అసెంబ్లీ సమావేశాలకు హాజరై తన నియోజకవర్గ సమస్యలు మాట్లాడాల్సిన బాధ్యత ఉందని స్పీకర్ సూచించారు.

జగన్ జీతం తీసుకోవడం లేదు, కానీ ఇతర ఎమ్మెల్యేలు తీసుకుంటున్నారు. విధులకు హాజరు కానప్పుడు జీతం ఇవ్వాల్సిన అవసరం లేదని, దీనికి ఒక పరిష్కారం కావాలని స్పీకర్ అభిప్రాయపడ్డారు. జగన్ స్పందనపై ఇంకా సమాచారం లేదు.