స్టాన్ఫోర్డ్ పరిశోధకులు సృష్టించిన మానవ మెదడు కణాల ఎలుకలు

స్టాన్ఫోర్డ్ విశ్వవిద్యాలయం పరిశోధకులు మానవ మెదడు కణాలతో జీవించే ఎలుకలను సృష్టించారు. న్యూరో సైంటిస్ట్ సెర్గ్యూ పాస్కా నేతృత్వంలో ఈ పరిశోధన జరిగింది. ఈ హైబ్రిడ్ జీవులకు పరిశోధకులు జెనోకార్టికల్ మైస్ అని పేరు పెట్టారు.

ఈ ఎలుకల మెదడులోని సెరిబ్రల్ కార్టెక్స్ దాదాపు పూర్తిగా మానవ కణాలతోనే నిర్మితమైంది. మెదడు ఘనపరిమాణంలో సగానికి పైగా మానవ కణజాలమే ఆక్రమించింది. సజీవమైన జీవి శరీరంలో మానవ మెదడు కణాలు ఎలా స్పందిస్తాయి, ఇతర అవయవాలతో ఎలా సంభాషిస్తాయి అనేది ప్రత్యక్షంగా పరిశీలించేందుకు ఈ పరిశోధన దారి తెరుస్తుంది.

ఈ ప్రయోగం కోసం శాస్త్రవేత్తలు దాదాపు ఏడేళ్ల పాటు శ్రమించారు. మానవ నాడీ కణాలు ఎలుక కణాల కంటే 20 రెట్లు నెమ్మదిగా వృద్ధి చెందుతాయి. సాధారణంగా ఎలుక కణాలే మానవ కణాలను అణచివేస్తాయి.

ఈ జీవ సంబంధమైన అడ్డంకిని అధిగమించడానికి పరిశోధకులు నాలుగు అంచెల వ్యూహాన్ని అమలు చేశారు. జెన్యూ మార్పిడి సాంకేతికత ద్వారా సెరిబ్రల్ కార్టెక్స్ లేకుండా జన్మించేలా ఎలుకలను రూపొందించారు. జ్ఞాపక శక్తి, ఆలోచన, ఇంద్రియ జ్ఞానాన్ని నియంత్రించే మెదడు పైభాగంలో ఖాళీ స్థలాన్ని సిద్ధం చేశారు.