ఏఐతో క్యాన్సర్, గుండె జబ్బులను 10 ఏళ్లలో అంతం చేయవచ్చని Anthropic CEO వ్యాఖ్య

మొండి జబ్బులకు మందులు కనుగొనడంలో ఏఐ టూల్స్ సాయపడతాయని Anthropic CEO డేరియో అమోడై అన్నారు. రాబోయే పదేళ్లలో క్యాన్సర్, గుండె జబ్బులు, మానసిక వ్యాధులు, అల్జీమర్స్ వంటి జబ్బులు బాగా తగ్గిపోతాయని ఆయన అంచనా వేశారు.

ఏఐ కారణంగా ఔషధాల అభివృద్ధిలో వేగం పెరుగుతుందని ఆయన చెప్పారు. కొత్త మందులను కనుగొనడం ఏఐతో సాధ్యమేనన్నారు. అయితే ఆ మందులకు క్లినికల్ ట్రైల్స్, పరీక్షలు చేయాల్సి ఉంటుందని ఆయన స్పష్టం చేశారు. ఈ పరీక్షలకు మనుషుల అవసరం ఉంటుందని కూడా ఆయన తెలిపారు.

అల్జీమర్స్, క్యాన్సర్, గుండె జబ్బులతో లక్షలాది మంది ఇబ్బంది పడుతున్నారని అమోడై అన్నారు. ఇలాంటి వ్యాధులను ఎదుర్కోవడం వైద్య శాస్త్రానికి పెద్ద సవాలుగా మారిందని ఆయన చెప్పారు. ఏఐ టెక్నాలజీని సరిగ్గా వాడితే పెద్ద మార్పులు సాధ్యమని ఆయన అభిప్రాయపడ్డారు.

ఇదే తరహా వ్యాఖ్యలు గతంలో Elon Musk, Google DeepMind CEO డెమిస్ హస్సాబిస్ కూడా చేశారు. పదేళ్లు పట్టే వైద్య పరిశోధనలను ఏఐతో ఒక వారంలోనే పూర్తి చేయవచ్చని హస్సాబిస్ అన్నారు. ప్రోటీన్ నిర్మాణాలను అంచనా వేసే AlphaFold టెక్నాలజీని ఆయన ఉదాహరణగా ఇచ్చారు. బయోలాజికల్ రీసెర్చ్‌లో ఏఐ పెద్దగా అభివృద్ధి చెందుతుందని ఆయన అభిప్రాయపడ్డారు. అమెరికా అధ్యక్షుడికి ఏఐ సాయంతో లభించే వైద్య సేవలు సాధారణ ప్రజలకూ అందుతాయని Elon Musk అన్నారు.

మరోవైపు కొంతమంది నిపుణులు భిన్నాభిప్రాయం వ్యక్తం చేస్తున్నారు. బయోలాజికల్ రీసెర్చ్‌లో ప్రస్తుత ఏఐ టెక్నాలజీ పనితీరు అంత మెరుగ్గా లేదని వారు చెప్తున్నారు. 2026 నాటికి ఏఐ గుర్తించిన ఏ ఔషధం కూడా పూర్తి క్లినికల్ ట్రైల్స్‌లో నెగ్గలేదని వారి వాదన.

ఒక ఔషధం పూర్తిగా అభివృద్ధి కావాలంటే ల్యాబ్ టెస్టులు, క్లినికల్ ట్రైల్స్ తప్పనిసరి. ఆ పరీక్షల్లో నెగ్గకపోతే మంది ఎంత త్వరగా తయారైనా ప్రయోజనం లేదని నిపుణులు చెప్తున్నారు.