ఒకే తుఫాన్, రెండు పంటలు: రసాయన సాగుకు నష్టం, ప్రకృతి వ్యవసాయం నిలిచింది

ఆంధ్రప్రదేశ్‌లోని పలు జిల్లాల్లో భారీ వర్షాలు, ఈదురుగాలులు సృష్టించిన తుఫాన్ ప్రభావంతో రసాయన పద్ధతిలో సాగు చేసిన పంటలు నేలకొరిగాయి. అదే ప్రాంతాల్లో ప్రకృతి వ్యవసాయ పద్ధతిలో పండించిన పంటలు తుఫానును తట్టుకొని నిలబడ్డాయి.

రైతు సాధికార సంస్థ అంచనాల ప్రకారం రసాయన వ్యవసాయ పంటల్లో 40 నుంచి 100 శాతం వరకు నష్టం నమోదైంది. ప్రకృతి వ్యవసాయ పంటల్లో మాత్రం నష్టం సున్నా నుంచి 20 శాతం వరకే ఉందని సంస్థ తెలిపింది.

పల్నాడు జిల్లా నాదెండ్ల మండలం చిరుమామిళ్ల గ్రామంలో రైతు యాదుల బాబు రసాయన పద్ధతిలో సాగు చేసిన పత్తి ఈదురుగాలులకు నేలకొరిగింది. అదే గ్రామంలో రైతు కిషోర్ బాబు ప్రకృతి వ్యవసాయ పద్ధతిలో సాగు చేసిన పత్తి మాత్రం నిలబడింది. గుంటూరు జిల్లా కొల్లిపర మండలం మున్నంగిలోనూ ఇదే పరిస్థితి కనిపించింది. రసాయన పద్ధతి వరి నేలకొరగగా, ప్రకృతి వ్యవసాయ వరి తుఫానును తట్టుకొని నిలిచింది.

ఎన్‌టీఆర్ జిల్లా రెడ్డిగూడెం మండలం బూరుగుగూడెంలో కోత దశలో ఉన్న రైతు రాజేష్ రెడ్డి రసాయన పద్ధతి వరి సగానికి పైగా నేలకొరిగింది. రైతు నాగేంద్రబాబు ప్రకృతి వ్యవసాయ వరి మాత్రం తుఫాను ప్రభావాన్ని తట్టుకుంది. కృష్ణా జిల్లా మోపిదేవి మండలం బొబ్బర్లంకలో రసాయన పద్ధతిలో సాగు చేసిన అరటి తోటకు నష్టం జరిగింది. అదే గ్రామంలో ప్రకృతి వ్యవసాయ పద్ధతిలో పండించిన అరటి తోటలు తుఫానును తట్టుకున్నాయి.

ఐదేళ్లుగా ప్రకృతి వ్యవసాయం చేస్తున్నామని ఓ రైతు తెలిపారు. ఎలాంటి రసాయనాలు వాడటం లేదని, జీవామృతం మాత్రమే వాడుతున్నామని ఆయన చెప్పారు. ప్రకృతి వ్యవసాయం పంటల స్థిరత్వంతో పాటు నేల ఆరోగ్యానికి, ప్రజల ఆరోగ్య పరిరక్షణకు దోహదం చేస్తుందని APCNF అధికారులు తెలిపారు.