వేరుశనగ పంట కోత సమయంలో రైతులు పాటించాల్సిన జాగ్రత్తలు

సెప్టెంబర్ రెండో పక్షంలో వేసిన వేరుశనగ పంట డిసెంబర్ చివరి నాటికి కోతకు వస్తుంది. సరైన పక్వ దశలోనే కోత చేయాలని నిపుణులు సూచిస్తున్నారు. కోత సమయంలో ఏమాత్రం తేడా వచ్చినా ఎకరానికి 3 నుంచి 4 వస్తాల దిగుబడి నష్టం వచ్చే ప్రమాదం ఉంది.

పంట కోతకు సిద్ధమైందా లేదా అనేది రైతులు ఇలా గుర్తించాలి. 70 నుంచి 80 శాతం మొక్కల ఆకులు, కొమ్మలు పసుపు రంగులోకి మారాలి. కాయ డొల్ల లోపలి భాగం నలుపు రంగులోకి మారినప్పుడు కోతకు సిద్ధమైనట్టు భావించాలి. కోతకు ఒక వారం నుంచి 10 రోజుల ముందే నీటి తెరలను ఆపాలి. కోత సమయంలో నేలలో తగినంత తేమ ఉండేలా చూసుకోవాలి.

కూలీల కొరత ఉన్న చోట ట్రాక్టర్‌తో నడిచే యంత్రాలతో పంట తీయవచ్చు. కోసిన వెంటనే మొక్కలను కుప్పలుగా చేసి నీడలో ఆరబెట్టాలి. గింజలు పూర్తిగా ఆరిన తర్వాత థ్రెషర్‌తో కాయల నుంచి గింజలను వేరు చేయాలి.

కోసిన సమయంలో కాయల్లో తేమ శాతం 20 నుంచి 30 శాతం ఉంటుంది. ఎండబెట్టిన తర్వాత ఈ తేమ 8 నుంచి 9 శాతానికి తగ్గాలి. తేమ ఎక్కువగా ఉన్న కాయలను నిల్వ చేస్తే బూజు తెగుళ్లు వచ్చే అవకాశం ఉంది. పాలిథిన్ లేదా గోనె సంచుల్లో నింపి, ఎండ, వెలుతురు తగలని ప్రదేశంలో నిల్వ చేయాలి.

తెలుగు రాష్ట్రాల్లో నూనె గింజల పంటల్లో వేరుశనగ ప్రధానమైంది. రాయలసీమ, ఉత్తర కోస్తా, ఉత్తర తెలంగాణ జిల్లాల్లో దీని సాగు ఎక్కువగా ఉంటుంది. తెలంగాణలో యాసంగిలో కొంత విస్తీర్ణంలో రైతులు సాగు చేశారు. ఈ సూచనలు కరీంనగర్ జిల్లా జమ్మికుంట కృషి విజ్ఞాన కేంద్రం శాస్త్రవేత్త విజయ్ తెలిపారు.