చిత్తూరు ఇంజినీరింగ్ కాలేజీలో విద్యార్థుల ఆందోళన: ఫీజుల ఒత్తిడిపై ఆరోపణలు

చిత్తూరు సమీపంలోని ఎస్‌వీసెట్ ఇంజినీరింగ్ కాలేజీలో ఫీజుల వసూళ్లపై విద్యార్థులు ఆందోళన చేపట్టారు. పెండింగ్ ఫీజులు చెల్లిస్తేనే సెమిస్టర్ పరీక్షలకు అనుమతిస్తామని యాజమాన్యం ఒత్తిడి చేస్తోందని విద్యార్థులు ఆరోపిస్తున్నారు.

ఫీజుల పేరుతో యాజమాన్యం వేధింపులకు గురిచేస్తోందని ఆరోపిస్తూ ఇద్దరు విద్యార్థినులు ఆత్మహత్యాయత్నానికి పాల్పడినట్లు విద్యార్థులు చెబుతున్నారు. వీరిలో సెకండ్ ఇయర్ CSE విద్యార్థిని మౌనిక చిత్తూరు ప్రభుత్వ ఆసుపత్రిలో చికిత్స పొందుతున్నారు. మరో విద్యార్థిని శ్రవంతి మృతి చెందిందని విద్యార్థులు ఆరోపిస్తుండగా, ఆ పేరుతో ఎవరూ తమ కాలేజీలో లేరని యాజమాన్యం చెబుతోంది.

శుక్రవారం ఉదయం 10 గంటల ప్రాంతంలో శ్రవంతి మృతి చెందిందంటూ విద్యార్థులు కాలేజీ గేటు ఎదుట ఆందోళనకు దిగారు. దీంతో పరిస్థితి ఉద్రిక్తంగా మారింది. కాలేజీ ఎదుట ఏర్పాటు చేసిన ఇనుము మెష్‌ను కొందరు ధ్వంసం చేయగా, పోలీసులు రంగంలోకి దిగి పరిస్థితిని అదుపులోకి తెచ్చారు. శ్రవంతి వివరాలు ఇవ్వాలని పోలీసులు కోరగా, ఆ పేరుతో ఉన్న ఐదుగురు విద్యార్థులను విద్యార్థులు చూపించారు.

ఈ ఘటనపై చిత్తూరు DSP వెంకట్ నారాయణ స్పందించారు. ఫీజుల వసూళ్లపై విద్యార్థుల నుంచి వివరాలు సేకరించేందుకు 10 మందితో కమిటీ ఏర్పాటు చేసినట్లు ఆయన తెలిపారు. కమిటీ నివేదికను జిల్లా కలెక్టర్‌కు అందజేసి విచారణ జరిపిస్తామని చెప్పారు. శ్రవంతి పేరుతో కావాలనే ప్రచారం చేస్తున్నారని కూడా DSP పేర్కొన్నారు.

పోలీసుల ప్రకటనలపై విద్యార్థులు సందేహాలు వ్యక్తం చేస్తున్నారు. మౌనిక ఆత్మహత్యాయత్నానికి పాల్పడినట్లు ఆసుపత్రి రిపోర్టులో ఉందని, అలాంటప్పుడు ఘటన జరగలేదని ఎలా చెబుతారని వారు ప్రశ్నిస్తున్నారు. శ్రవంతి ఆచూకీపై స్పష్టత ఇవ్వాలని, ఫీజులపై ఏర్పాటు చేసిన కమిటీ సమగ్ర విచారణ జరిపి వాస్తవాలు బయటపెట్టాలని వారు డిమాండ్ చేస్తున్నారు.

ఈ వ్యవహారానికి నేపథ్యంగా ఫీజు రీఇంబర్స్‌మెంట్ బకాయిలు ఉన్నాయని విద్యార్థులు చెబుతున్నారు. రాష్ట్రంలో ప్రభుత్వం మారిన తర్వాత విద్యార్థులకు చెల్లించాల్సిన రీఇంబర్స్‌మెంట్ నిధులు రావడం లేదని, దీని భారం విద్యార్థులపై పడుతోందని వారి ఆరోపణ. గత మూడు నెలల్లో కాలేజీలో ఏడుగురు విద్యార్థులు ప్రాణాలు కోల్పోయారని విద్యార్థి సంఘాల నాయకులు ఆరోపిస్తున్నారు. ఈ మరణాలపై సమగ్ర విచారణ జరిపించాలని, యాజమాన్యంపై చర్యలు తీసుకోవాలని వారు డిమాండ్ చేస్తున్నారు. కమిటీ నివేదిక ఆధారంగా తదుపరి చర్యలు ఉంటాయని పోలీసులు తెలిపారు.