మణికరణ్ సాహిబ్‌లో నిప్పు లేకుండా వంట.. సహజ వేడి నీటి బుగ్గలే పొయ్యి

హిమాచల్ ప్రదేశ్ కులు జిల్లాలోని పార్వతీ లోయలో మణికరణ్ సాహిబ్ గురుద్వారా ఉంది. ఇక్కడ నిప్పు లేకుండా, సహజ వేడి నీటి బుగ్గల్లోనే వంట చేస్తారు.

పార్వతీ నది ఒడ్డున ఉన్న ఈ బుగ్గల నీటి ఉష్ణోగ్రత దాదాపు 100 డిగ్రీల సెంటీగ్రేడ్ ఉంటుంది. భూమి లోపలి నుంచి సహజంగా పైకి వచ్చే ఈ నీరు చాలా వేడిగా ఉంటుంది.

బియ్యం, పప్పు, కూరగాయలను పెద్ద పాత్రల్లో లేదా వస్త్రపు మూటల్లో కట్టి మరుగుతున్న నీటి కుండల్లో ఉంచుతారు. ఆ వేడి ఆవిరితోనే అన్నం, పప్పు, కూరలు ఉడికిపోతాయి. అరగంటలోనే ఆహారం సిద్ధమవుతుంది. టీ కూడా ఇదే వేడి నీటితో చేస్తారు.

ఈ గురుద్వారాలో 24 గంటల పాటు ఉచిత లంగర్ అందుబాటులో ఉంటుంది. ఉండడానికి కూడా ఉచిత బస సౌకర్యం ఉంది.

సిక్కు మత స్థాపకుడు గురునానక్ దేవ్ జీ తన శిష్యులతో దేశాటన చేస్తూ ఈ ప్రాంతానికి వచ్చారని భక్తుల విశ్వాసం. ఆయనకు వంట చేయడానికి నిప్పు లేకపోవడంతో ఒక రాయిని తొలగించగా, అక్కడ వేడి నీటి బుగ్గ ఉబికి వచ్చిందని చెబుతారు. అక్కడే గురుద్వారా నిర్మించారు.

శివుడు, పార్వతి ఇక్కడ కొంతకాలం గడిపారని పురాణ కథ కూడా ఉంది. పార్వతి చెవిపోగు వాగులో పోగొట్టుకోగా, శివుడు తన మూడో కన్ను తెరిచాడని చెబుతారు. ఆ జ్వాలలను ఆపడానికి ఆదిశేషుడు బుసకొట్టగా మరుగుతున్న నీటి ప్రవాహం ఏర్పడిందని భక్తుల నమ్మకం.

మణికరణ్ సముద్ర మట్టానికి 1,760 మీటర్ల ఎత్తులో ఉంది. కసోల్ నుంచి 4 కిలోమీటర్లు, కులు నుంచి 45 కిలోమీటర్లు, భుంతర్ నుంచి సుమారు 35 కిలోమీటర్ల దూరంలో ఈ పట్టణం ఉంది. 15వ శతాబ్దంలో రాజా జగన్ సింగ్ ఇక్కడ ఆలయాన్ని నిర్మించారు. ఇక్కడ ఒక ప్రయోగాత్మక భూ ఉష్ణ శక్తి ప్లాంట్ కూడా ఏర్పాటు చేశారు.